Tramp Ğazzä tınıçlıq şurası tözelüen belderde

AQŞ ilbaşı Donald Tramp Ğazzä tınıçlıq şurası tözelü protsessında buluın häm aña "dönyanıñ iñ möhim däwlätläre" liderlarınıñ keräçägen belderde.

Tramp yäkşämbe könne ilbaşı oçqıçında matbuğat wäkillärenä yasağan belderüendä: "Tınıçlıq şurası tözelä. Nigezdä, iñ möhim däwlätlärneñ iñ möhim liderları bulaçaq... İñ möhim liderlarnı häm däwlätlärne küz aldına kitersägez, Tınıçlıq şurası da näq menä alardan toraçaq", — dip äytte.

Tramp bu initsiativağa quşılu öçen köçle xalıqara qızıqsınu buluın da östäde: "Barısı da bu qorılış êçendä bulırğa teli", — dide.

Trampnıñ üzeneñ citäkçelek itüe häm yaqınça 15 dönya liderın üz êçenä aluı kötelgän bu şura soñraq tözelergä tiyeşle Fälästin texnokrat xökümäten kontrol itäçäk häm Ğazzäne yañadan torğızu barışın küzätü astında totaçaq.

Şurağa kerüe farazlanuçı illär arasında Angliya, Germaniya, Frantsiyä, İtaliyä, Soğud Ğaräbstanı, Qatar, Misır häm Törkiyä bar. BMOnıñ Yaqın Könçığış buyınça êlekkege maxsus wäkile Nikolay Mladenovnıñ Tınıçlıq şurasınıñ mäydandağı wäkile bularaq wazıyfa başqaraçağı belderelä.

Şuranıñ bu atnada iğlan iteläçäge turında xäbärlär bulsa da, Tramp bu mäs'älädä tögäl waqıt äytmäde.

Tramp administratsiyäse Tınıçlıq şurasın ütkän ayda tanıtunı planlaştırğan ide, läkin bu belderüne berniçä tapqır kiçekterde.

İzrail 2023nçe yılnıñ oktyabrennän birle Ğazzädä, küpçelege xatın-qızlar häm balalar bulğan, 71 meñnän artıq fälästinlene üterde häm 170 meñnän artıq keşene yaraladı.