Awrupa Berlege Rusiyägä qarata yaña sanktsiyälär paketın qabul itte, dip belderde Berlekneñ tışqı säyäsät citäkçese pänceşämbe könne.
"Bez 19nçı sanktsiyälär paketın qabul ittek. Ul Rusiyä bankların, kripto almaşu platformaların, Hindstan häm Qıtaydağı qayber oyışmalarnı maqsat itep ala," dip yazdı Kaya Kallas “X” platformasında.
Şulay uq, Awrupa Berlege Rusiyä diplomatlarınıñ xäräkätlären çikläwne "totrıqlılıqnı qaqşatu tırışlıqlarına qarşı toru" öçen başqaruın belderde.
"(Rusiyä ilbaşı Vladimir) Putinğa bu suğışnı finanslaw tağın da awıraya bara," dip östäde Kallas kiläse yıl başında dürtençe yılın tutıraçaq Rusiya-Ukraina suğışı turında.
Şul uq waqıtta, AQŞ çärşämbe könne Rusiyä neft şirkätläre “Rosneft” häm “Lukoil”ğa yaña sanktsiyälär kertte, bu qarar Mäskäwneñ Ukraina suğışın tuqtatu öçen "tınıçlıq protsessına citdi qaramawı" belän añlatıldı.
Öç yıldan artıq däwam itüçe Rusiyä häm Ukraina arasındağı suğış waqıtında millionnarça keşe ülde, yaralandı yäisä küçep kitärgä mäcbür buldı.
Qıtay Awrupa Berlegen tänqıytli, suğıştan çığunıñ berdänber yulı-söyläşülär buluın belderä
Qıtay pänceşämbe könne Awrupa Berlegen Rusiyägä qarata yaña sanktsiyälär öçen tänqıytläde häm Rusiyä-Ukraina suğışınnan çığu öçen "söyläşülär häm kileşülär – berdänber mömkin yul" dip belderde.
Qıtay "bu qararğa qatğıy qarşı" häm "Awrupa Berlegenä citdi protest belderde," dip äytte Qıtay tışqı êşlär ministrlığı wäkile Guo Jiakun Pekinda ütkän matbuğat oçraşuında.
"Bez berniçä tapqır assızıqladıq: Qıtay xäzerge krizisnıñ töp säbäbe tügel häm ul bu konfliktta ber yaqnı da yaqlamıy," dip belderde Guo.
"Qıtay tınıçlıq söyläşülären alğa sörü öçen tırışa, bäreleşüçe yaqlarğa üterüçe qorallar birmäde häm ike maqsatlı äyberlärne êksportlawda nıqlı kontrol urnaştırdı," dip östäde ul, Awrupa Berlegen "Qıtayğa qarata problemalar tudırunı tuqtatırğa häm Qıtaynıñ mänfäğätlären qaqşatmasqa" çaqırıp.
"Bu Qıtay häm Awrupa Berlege mönäsäbätläreneñ totrıqlı üseşe öçen faydalı tügel," dip belderde wäkil.
Hindstan cawap birmäde
Hindstan älegä yaña sanktsiyälärgä räsmi cawap birmäde. Läkin, êlegräk Yaña Dähli AQŞ häm Awrupa Berlegen Rusiyä neften satıp aluğa bäyle sanktsiyälär, salımnar häm kisätülär öçen kisken tänqıytlägän ide.
Hindstan xökümäte AQŞ häm Awrupa Berlegen Rusiyä belän şundıy uq tranzaktsiyälär öçen Hindstannı tänqitlägän waqıtta, üzläre Rusiya tovarların, bigräk tä ênergiä resursların, zur külämdä importlawda ğayepläde.
Rusiyä: Awrupa sanktsiyäläre faydasız
Rusiya tışqı êşlär ministrlığı pänceşämbe könne Awrupa Berlege sanktsiyäläreneñ töp täêsire Berlekneñ üzendä sizelüen belderde, häm Awrupa êlitalarınıñ sanktsiyälärneñ faydasızlığın qabul itä almawın assızıqladı.
Zelenskiy: AQŞ häm Awrupa sanktsiyäläre "bik möhim"
Ukraina ilbaşı Volodimir Zelenskiy AQŞ häm Awrupa Berlege tarafınnan Rusiyä ênergiä sektorına kertelgän sanktsiyälärne "bik möhim" dip atadı.
"Bez monı köttek. Xoday yärdäme belän faydası bulsın, bu bik möhim," dip belderde Zelenskiy Brüsseldäge Awrupa sammitında jurnalistlarğa. Ul AQŞnıñ "dönya illärenä sanktsiyälärgä quşılu öçen yaxşı signal cibärüen" assızıqladı.
