Ärmänstan xalqı 6 yıl êlek Azerbaycanğa xärbi ciñelüdän soñ xökümätneñ tınıçlıq kileşüen täêmin itü tırışuların da sınap qarayaçaq parlament saylawında yäkşämbe könne tawış birä.
Anketalar Başministr Nikol Paşinyannıñ xakimiyättäge “Grajdan kileşü” partiyasınıñ 32%qa citkän saylaw yaqlawı belän aldan baruın, Rusiyä yaqlı “Köçle Ärmänstan” partiyäseneñ isä 11% tiräsendä ikençe urında toruın kürsätä.
2018nçe yılda xakimiyätkä kilgännän birle Ärmänstannı Könbatışqa tağın da yaqınaytuçı Paşinyan ilen tradiśion ximayäçese bulğan Rusiyädän çitläşterde, bu wazğiyät saylaw aldı barışta Mäskäwneñ reakśiyäsen tudırdı.
Jurnalistika häm oppoziśiya aktivıstınnan säyäsätkä adım yasağan Paşinyan çorında ber keşegä turı kilgän milli tulayım tabış ta ike tapqır artqan.
Comğa könne Yerivannıñ üzäk mäydanında Paşinyan öçen oyıştırılğan mitingta qatnaşqan 39 yäşendäge saylawçı Karine Darbinyan: "Ärmänstannıñ küzlärem aldında üsep qamilläşüen kürüdän min çınnan da bik şat”, - dip äytte.
Oppoziśiyäneñ tänqitläwläre
Paşinyan oppoziśiyä häm cämäğätçelekneñ qayber qatlamnarı tarafınnan köçle tänqitkä duçar buldı, bigräk tä 2020nçe yılda 2nçe Qarabax suğışınnan soñ, bu tänqit kübesençä Baqı belän tınıçlıq urnaştıru tırışlıqlarına yünältelgän.
Paşinyan bu tänqitlärgä cawap itep üzeneñ saylaw kampaniyäseneñ üzägenä tınıçlıq urnaştıru tırışlıqların quydı, şularnıñ iñ möhime – 1980nçe yıllar axırınnan birle törle waqıtlarda däwam itkän suğıştan soñ uzğan yılnıñ avgustında Aq Yortta Azärbaycan belän imzalanğan kileşü.
Ärmänstan oppoziśiyäsenä uzğan yıl Rusiyä ärmäniye milliarder Samvel Karapetyan tarafınnan tözelgän “Köçle Ärmänstan” belän bergä Rusiyä yaqlı törkemnär yünäleş birä. Karapetyan, Ärmänstannı möhim ênergiya täêmin itüçese häm êksportçı bulğan Rusiyägä yaqın totarğa teli.
Uzğan atnada Yerivanda oyıştırılğan “Köçle Ärmänstan” uram cıyınında üzen Gayane dip kenä tanıştırğan ber xatın-qız: "Ärmänstanıbıznıñ ärmän bulıp qaluın täêmin itäçäge” öçen Karapetyannı yaqlawın belderde.
Saylaw ärcäläre cirle waqıt belän irtänge säğät sigezdä (Törkiyä waqıtı belän cidedä açılıp kiçke sigezdä yabılaçaq.
Diñgez buyında urnaşmağan 3 million xalıq sanına iyä ildä yaqınça 2 million 480 meñ terkälgän saylawçı bar.
