Rusiyäneñ keşe sälamätlege häm qullanuçılar xoquqların yaqlaw xezmäte däğwalarnı kire qaqsa da, ber AQŞ Däwlät departamentı wäkile älege barışnı yaqınnan küzätep baruların belderep: "Rusiyä räsmi zatların döres mäğlümatlarnı tiz häm açıq räweştä xalıq belän urtaqlaşırğa çaqırabız," - dide.
Rusiyäneñ Seber ölkäsendäge İrkutskta Çuma belän köräş institutında laborant bulıp êşlägän xatın-qıznıñ 2 oktäbr kiçendä şikle infekśiya näticäsendä wafat buluı laboratoriya qazası häm kizü qurqınıçın uyattı.
Rusiyä matbuğatına kürä 28 yäşlek institut xezmätkäre Darya Şipilovağa pnevmoniya diagnozı quyılğan; tikşerenüçeneñ çumağa säbäp bula torğan "Yersinia pestis" bakteriyase bulğan watıq probirkağa tiyüe farazlana.
Qayber matbuğat çaraları isä yäş laborantnıñ êş säfärennän qaytqaç awıruın belderde. Yaqınça 200 keşe karantinda.
Rusiyäneñ keşe sälamätlege häm qullanuçılar xoquqların yaqlaw xezmäte Şipilovanıñ çığanağı bilgesez bulğan pnevmoniya arqasında wafat buluın citkerde. Şulay da institutta yoğuçı mikroorganizmnar belän êşlägändä qazanıñ bulmawı häm soñğı 10 kön êçendä institut xezmätkärläre arasında sälamätlek saqlaw oyışmalarına möräcäğat itüçeneñ bulmawı assızıqlandı.
AQŞ: “Rusiyä räsmi zatların döres mäğlümatlarnı xalıq belän urtaqlaşırğa çaqırabız”
Bu waqıyğadan soñ AQŞ xökümäte dä êşkä kereşte. AQŞ matbuğatına belderü yasağan ber AQŞ Däwlät departamentı wäkile: "Rusiyäneñ İrkutsk töbägendä ülem belän tämamlanğan şikle üpkä çuması turındağı xäbärlärne işettek. Bu xälne Xastalıqlarnı kontrol’ itü häm buldırmaw üzäge häm başqa oyışmalar belän xezmättäşlektä yaqınnan küzätäbez," - dip äytte.
