“Vaşington Grenlandiyädäge Rusiya qurqınıçın beterü öçen qatğıy adımnar yasayaçaq”

AQŞ ilbaşı Donal'd Tramp düşämbe könne Vaşingtonnıñ Grenlandiyädäge “Rusiya qurqınıçın” beterü öçen qatğıy adımnar yasayaçağın belderde.

Tramp “Truth Social” platformasında bolay dip yazdı:
“NATO 20 yıl buyı Daniyägä Grenlandiyädäge Rusiya qurqınıçın beterergä kiräk dip äytä. Qızğanıç, Daniya bu xaqta bernärsä dä êşlämäde.  Xäzer waqıt citte häm ul êşlänäçäk!”

Awrupa Berlegeneñ çirattağı räise bulğan Daniya tışqı êşlär ministrlığı “Reuters” agentlığınıñ añlatma taläbenä cawap birmäde.

Tramp küp tapqırlar Daniyägä bäyle üzidaräle töbäk bulğan Grenlandiyäne aludan başqa berni belän dä qanäğät’länmäyäçägen äytte.

Daniya häm Grenlandiya citäkçeläre utrawnıñ satılmawın häm AQŞ sostavına kerergä telämäwlären belderälär.

Yäkşämbe könne NATO ğomum särqatibe Mark Rutte belän Tramp telefon aşa Grenlandiya häm Arktikadağı iminlek turında söyläştelär.

Rutte bu mäs'älä östendä êşläwne däwam itäçäklären äytte häm bolay dip östäde: “Min bu atnada Trampnı Davosta kürüne sabırsızlıq belän kötäm.”

Tramp şimbä könne yaña adım yasap, Vaşingtonnıñ 1 fevral'dän başlap 8 Awrupa ile - Daniya, Norvegiya, Şveśiya, Franśiya, Germaniya, Böyekbritaniya, Niderland häm Finlyandiyädän kilgän tovarlarga 10% külämendä tamğaxanä salımı kertäçägen häm iyün'gä qadär anıñ 25%qa qadär artaçağın belderde; monıñ säbäbe bularaq bu illärneñ Grenlandiyädäge AQŞ kontrolenä qarşı çığuların kürsätte.

8 Awrupa ile yäkşämbe könne urtaq belderü yasap, AQŞnıñ bu yanawın ğäyepläde häm Arktika iminlegenä tuğrılıqların yañarttılar.

Şul uq waqıtta Kreml' uzğan atnada Grenlandiyäneñ Danimarkaga bäyle xoquqıy statusın tanıdı häm utrawdağı xäzerge xälne bik bäxäsle dip bäyäläde.

Kreml' süzçese Dmitriy Peskov: “Bez Grenlandiyäneñ Daniya Patşalığı qaramağındağı töbäk buluın añlap êş itäbez”,- dip belderde.