Berläşkän Millätlär Oyışması tikşerüçeläre fikerençä, İzrail'neñ fälästinle balalarğa añlı räweştä höcüm itüe Ğazzädä alıp barılğan genotsidnıñ töp êlementına äylängän.
BMOnıñ Bäysez Xalıqara Tikşerü Komissiyäse "Fälästin balaların İzrail' qurqınıçsızlıq köçläreneñ añlı räweştä höcümgä duçar itüe häm üterüenä" dälillär tabuın citkerde.
BMO isemnän çıgış yasağan öç keşedän torğan tikşerü törkeme uzğan sentyabrdä çıqqan xisapta İzrailneñ Ğazzäğä qarşı suğışında genotsid yasawın açıqladı.
Soñğı küzätü xisabında İzrail xärbi operatsiyäläreneñ intensivlığı häm sistemalı xarakterı däwam itüe, monıñ isä Fälästin balaları arasında ülem, yaralanu häm travmalarnıñ "moñarçı kürelmägän" däräcägä kiterüe äytelä.
Räsmi zatlar İzrail' xakimiyätläre häm qurqınıçsızlıq köçläre Ğazzädä "genotsid ciñayätlären qılunı däwam itä" digän näticägä kilü öçen "nıqlı nigezlär" bar dip belderde.
Ğazzädä balaçaq "yuqqa çığarıldı"
2021 yılda BMOnıñ Keşe xoquqları şurası tarafınnan oyıştırılğan komissiyä awır fizik häm psixik cäräxätlär, massaküläm travma, yätimlek, ğailädän ayırılu, qabat-qabat küçenü, açlıq, mäğarif häm sälamätlek saqlaw sistemalarınıñ cimerelüe Ğazzädä "balaçaqnı yuq itte" häm töbäqtäge balalarğa ğomer buyı täêsir itäçäk dip belderde.
Tikşerü komissiyäse räise bulğan Hindstan mäxkämä räise Şrinivasan Muralidxar bolay dip belderde: "Balalarnı maqsat itep quyu belän İzrail Fälästin xalqınıñ yaşäw häm kiläçägen bilgeläw sälätenä höcüm itä. 2025 yılnıñ oktyabrendä utnı tuqtatudan soñ da, balalar üterelä häm qatı yaralana".
