Rusiyäneñ “İnterfaks” mäğ’lümar agentlığı xäbärenä qarağanda, Rusiya däwlät ilbaşı Vladimir Putinnıñ iñ yuğarı däräcädäge tışqı säyäsät kiñäşçese yäkşämbe könne yasağan belderüendä Awrupa häm Ukrainanıñ AQŞnıñ tınıçlıq täq’dimnärenä kertkän üzgäreşläreneñ Ukrainada suğışnı tuqtatu ömetlären arttırmawın äytte.

Kreml’ kiñäşçese Yuriy Uşakov jurnalistlarğa bolay dide:
“Bu — faraz tügel. Awrupalılar häm ukrainalılar kertkän yäisä kertergä tırışqan täq’dimnär dokumentnı yaxşırtmadı häm ozaq waqıtlı tınıçlıqqa ireşü mömkinlegen nığıtmadı”.

Awrupa häm Ukraina söyläşüçeläre yaqınça dürt yıl däwam itkän qarşılıqnı tuqtatunı küzdä totqan AQŞ tarafınnan xuplanğan proyektqa üzgäreşlär kertü turında fiker alışalar, läkin bu üzgäreşlärneñ närsälärne üz êçenä aluı älegä tögäl bilgele tügel.  

AQŞ söyläşüçeläre şimbä könne Floridada Rusiya räsmiläre belän oçraştılar.

Öç yaqlı söyläşü mömkinlege yuq

İkençe yaqtan, Putinnıñ maxsus wäkile Kirill Dmitriev AQŞnıñ maxsus Wäkile Stiv Vitkoff häm AQŞ ilbaşı Donal'd Trampnıñ kiyäwe Djared Kuşner belän ütkärelgän oçraşularnıñ konstruktiv uzuın häm alarnıñ yäkşämbe könne dä däwam itäçägen belderde.

Läkin Kreml’ Ukraina, Rusiya häm Amerika Quşma Ştatlarınıñ öç yaqlı oçraşu mömkinlege yuq dip belderde.  

Rusiya mäğ’lümat agentlıqları citkergänçä, Uşakov
“Xäzerge waqıtta bu iniśiativa turında citdi fiker alışu bulmadı häm minem belüemçä mondıy äzerlek êşläre alıp barılmıy” dide.