YUNESKOnıñ Parijdağı üzägendä märxüm qırğız yazuçısı, jurnalist, diplomat häm däwlät êşleklese Çıñgız Aytmatovnı iskä alu konferenśiyäse ütte.

Qırğızstannıñ YUNESKOdağı daimi missiyäse TÜRKSOY belän bergä oyıştırğan “Çıñgız Aytmatov häm YUNESKO: dön’yanı berläştergän urtaq miras” çarasında Aytmatovnıñ tormışına bağışlanğan dokumental’ fil’m kürsätelde; anda diplomatlar, mädäniyat êşlekleläre häm xalıqara qunaqlar qatnaştı.

Qırğızstannıñ YUNESKOdağı daimi wäkile ilçe Sadıq Şer-Niyaz, fil’mneñ Aytmatovnıñ daimi mirasın çağıldırunı maqsat itep quyuın belderde.

Parijdä ütkän çara Aytmatovnıñ global’ mirasına, anıñ mäñgelek mädäni xäterenä häm keşe qaderenä basım yasadı.

Törkiyäneñ YUNESKOdağı daimi wäkile Aytmatovnı 20 nçe ğasırnıñ iñ zur, iñ köçle tawışlarınnan berse dip atadı.  

Şer-Niyaz:
"Bu fil’mne qarağanda min üzemne öygä qaytqan kebek xis ittem.  Aytmatov härwaqıt keşelär, xezmätkärlär, analar turında yazdı. Bez ul qaldırğan miras belän ğorurlana alabız. Bügenge qatlawlı çorda ul böten keşelekkä yul kürsätä dip uylıym”,-  dip äytte.

Ul şulay uq Törkiyäneñ YUNESKOdağı daimi wäkile ilçe Gülnur Aybetkä öleş kertkän öçen räxmät äytte häm Aytmatovnıñ qırğız mädäni şäxesläre isemlegendä iñ başta toruın assızıqladı.

“20 nçe ğasırnıñ iñ köçle tawışlarınnan berse”

Aybet Aytmatovnı 20 nçe ğasırnıñ iñ zur, iñ köçle tawışlarınnan berse dip atadı.

"Çıñgız Aytmatov – qırğız ädäbiyatınıñ iñ zur roman ostası ğına tügel, ä törki dön’yanıñ häm böten dön’ya ädäbiyatınıñ da möhim şäxeslärennän berse”,– dip belderde.

Äsärläre 170 telgä tärcemä itelgän Aytmatovnıñ xalıqara auditoriyäse buluın äytkän Aybet, anıñ äsärläreneñ tınıçlıq häm berdämlekkä basım yasawın äytte.  

Aybet:
"Aytmatovnıñ qaläme keşelär, tabiğat’ häm cämğıyät’ arasındağı mönäsäbätlärne fälsäfi yaqtan açıp birä. Urtaq xäter tiränlegennän köç alğan qaläme keşelekneñ urtaq problemalarına global’ cawaplar êzlägän vöcdan kebek söyläşä”,– dip bäyäläde.

Azärbaycannıñ YUNESKOdağı daimi wäkile ilçe Elman Abdullayev Aytmatovnı böten keşelekneñ ğorurlığı dip atadı. TÜRKSOY ğomum särqatibe Soltan Rayev isä anı xalıqlar arasında küper salğan gumanist dip maqtadı.

Rayev:
"Aytmatovnıñ äsärläre Urta Aziyäne dön’yaga açtı. Romannarı keşe qaderen, tabiğat’ne häm tınıçlıqnı alğı planğa quya. Ul tudırğan mañqort fenomenı  tamırlarınnan ayırılğan, xäteren häm kemlegen yuğaltqan keşeneñ fäciğasen köçle räweştä kürsätä. Bu töşençä roman êlementı ğına tügel, ä ütkäne belän bäyläneşen yuğaltqan cämğıyät’lärneñ kiläçäge turında  kisken kisätü”,- dip östäde.