Ukraina armiyäse häm cirle wäqalätlelär beldergänçä, Rusiya yäkşämbe könne distälägän dron, ballistik häm qanatlı raketalar qullanıp ayıruça ênergetika infrastrukturasına höcüm itte.

Tönlä oyıştırılğan höcümnär Kiyev häm başqala tirä-yağında, Qara diñgez buyındağı port şähäre Odessada häm Ukrainanıñ urta öleşlärendä bulğan.

Kiyev töbägendä kim digändä ber keşe yaralanğan, biş rayon  häm unnan artıq yortqa zıyan kilgän.

Töbäk gubernatorı Mikola Kalaşnik bu xaqta Telegram aşa belderde.

Odessa gubernatorı Oleg Kiper dä Telegramda töbäkneñ ênergetika infrastrukturasına tönlä bulğan dron höcümeneñ yanğınnarğa kiterüen, soňınnan yanğınnarnıñ sünderelüen citkerde.

Rusiya kön sayın diyärlek Ukrainanıñ ênergetika sistemasına höcüm itep, cılılıq êlektr stanśiyälären häm êlektr podstanśiyälären maqsat itep ala.

L’vovta şartlaw

Ukraina milli poliśiyäse beldergänçä, L’vov şähärendä tön urtasında berniçä şartlatqıç caylanma şartlaw näticäsendä ber poliśiya xezmätkäre hälaq bulğan, 24 keşe yaralanğan.

Poliśiya Telegram aşa yasağan belderüendä: “Aldan bäyäläwgä kürä, quldan yasalğan şartlatqıç caylanmalar şartlawı bilgelände”,- dip citkerde.

Belderügä qarağanda, berençe şartlaw kibettä urlaw omtılışı turında xäbär alınğannan soñ anda patrul’ törkeme kilgäç bulğan; küp tä ütmi ikençe şartlaw barlıqqa kilgän.

L’vov mêrı Andrey Sadovıy waqıyğanı terror ğamäle dip bäyäläde.