AQŞ ilbaşı Donald Trampnıñ İranğa çiklängän höcüm oyıştırırğa uylawın äytüennän soñ, Tähran citäkçelege düşämbe könne, çiklängän bulsa da, teläsä-nindi Amerika höcümeneñ "agressiyä aktı" bularaq bäyälänäçägen häm cawap qaytaruğa kiteräçägen belderde.

İran tışqı êşlär ministrlığı süzçese İsmail Bäkayi: "Minemçä, çiklängän höcüm dip atalğan närsä yuq. Agressiyä aktı agressiyä aktı bularaq qabul itelä. Bu şulay. Teläsä-qaysı däwlät, qanunıy saqlanu xoquqı qısalarında, agressiyä aktına qatı räweştä cawap birä; bez dä şunı uq êşlärbez", — dip belderde.

Yaqın Könçığışta Amerika xärbi köçe urnaşudan soñ, AQŞnıñ İranğa xärbi xäräkät yanawlarında artu küzätelä.

Töbäktäge Amerika mänfäğätläreneñ mömkin bulğan maqsatlar buluına işärä itep, İran tışqı êşlär ministrı Abbas Araqçi “CBS News” kanalına yäkşämbe könne: "Ägär AQŞ bezgä höcüm itsä, ul waqıtta üz-üzebezne saqlar öçen barlıq xoquqlarıbız bar", — dip äytte. Şunıñ belän bergä, ul "diplomatik çişeleşкä ireşü mömkinlegeneñ yuğarı buluın" da belderde.

Jenevada ütkärelgän soñğı söyläşülär turınnan soñ İran, xärbi qatışunı kirtäläyäçäk ber kileşü öçen täqdim äzerläwen belderde.