İlçeleklärneñ belderüenä kürä, Könyaq Koreya häm Hindstan, kiyerenkelekneñ artuı häm AQŞnıñ xärbi höcüme yanawı säbäple, üz watandaşların İrannan kitergä çaqırdı.
Könyaq Koreyanıñ İrandagı ilçelege internet säxifäsendä bastırılğan belderüendä ilneñ iminlege tiz arada naçarayırğa mömkin ikänen äytte. İlçelek Könyaq Koreya watandaşların media xäbärlären häm ilçelek iğlannarın iğtibar belän küzätergä, şäxsi iminlekne täêmin itü öçen östämä çaralar kürergä çaqırdı.
Tährandağı Hindstan ilçelege isä "X" platformasında bastırılğan belderüdä watandaşlarına, oçışlarnı da kertep, barlıq transport çaraları belän İrannan kitergä kiñäş itte. İlçelek yärdäm kiräk bulğan watandaşlarnıñ ilçelek belän bäyläneşkä kerüen sorap, aşığıç êlemtä nomerların urtaqlaştı.
Serbiya tışqı êşlär ministrlığı da watandaşların İrannan "mömkin qadär tizräk" kitärgä çaqırdı häm regional' kiyerenkelek säbäple iminlek xäleneñ naçarayuın belderep, bu ilgä säfär yasamasqa kiñäş itte.
Bu kisätülär AQŞnıñ Yaqın Könçığıştağı xärbi barılığın arttıruı belän ber ük waqıtqa turı kilä. "USS Abraham Lincoln" aviataşuçısı häm östämä xärbi oçqıçlar töbäkkä inde kilep citte. "USS Gerald R. Ford"nıñ da yulda buluı xäbär itelä.
AQŞ ilbaşı Donald Tramp ütkän pänceşämbe könne İran belän söyläşülärneñ näticä birüe öçen 10-15 könlek waqıt birde, xärbi çaralar qaralgançı bu waqıtnıñ qullanılaçağın äytte. Comğa könne yanawların qabatlağan Tramp, İrannı "citdi" kileşügä mäcbür itü öçen çiklängän höcüm ixtimalın da qarıy.
Omman tışqı êşlär ministrınıñ yäkşämbe könne citkerüenä kürä, yaqlar pänceşämbe könne Şveytsariyanıñ Jeneva şähärendä yaña atom-töş söyläşüläre uzdıraçaq.
