Törkiyä belän Soğud Ğaräbstanınıñ ACWA şirkäte bıyıl Antaliyada uzaçaq Berläşkän Millätlär Oyışmasınıñ klimat üzgäreşe konferenśiyäse - COP31 qısalarında 5 gigavattlıq yañartıla torğan ênergiya ölkäsendä xezmättäşlek kileşüeneñ ikençe êtabına qul quyarğa äzerlänä.
Bu xaqta “Anadolu” agentlığına ACWA idarä şurası räise Möxämmäd Abunayyan xäbär itte.
Planlaştırılğan imza salu ike il arasında ireşelgän xökümätara kileşü nigezendä qalğan 3 gigavatt quätne üz êçenä alaçaq.
Bu atnada Törkiyäneñ Sivas häm Karaman vilayät’lärendä tormışqa aşırılaçaq berençe 2 gigavattlıq qoyaş ênergiyäse proyektlarına qağılışlı kileşü imzalanğan ide.
Abunayyan İstanbulda Sivas häm Taşeli qoyaş êlektr stanśiyäläre turındağı imza tantanası qısalarında comğa könne “Anadolu” agentlığına birgän interv’yusında: “COP31gä qadär yañartıla torğan ênergiya häm saqlaw ölkäsendä 3 gigavatt kileşüen imzalayaçaqbız”,— dide.
Ul yaña êtapnıñ qoyaş, cil häm saqlağıçlar qatnaşması bulaçağın belderde, şirkätneñ başlanğıç 2 gigavattlıq qoyaş proyektlarına saqlağıçlarnı integraśiyäläwne dä bäyäläwlären citkerde.
Bu atnada imzalanğan berençe êtap ilbaşı Räcäp Tayyip Ärdoğannıñ 3 fevral’dä Soğud Ğaräbstanına yasağan säfäre waqıtında kileşelgän 5 gigavattlıq qısanıñ ber öleşe bulıp tora.
Abunayyan äytüençä, röxsät häm êkologik raslaw prośessları tämamlanğaç, 2 gigavattlıq qoyaş quäten tözü êşlären kiläse yılda başlaw kötelä, berençe êlektr ênergiyäsen isä 2028 yılnıñ başında birü maqsat itep quyıla.
Antaliya 9–20 noyabr’ könnärendä COP31 ne qabul itäçäk.
Liderlar sammitı İstanbulda uzaçaq dip kötelä.
Yaqınça 200 il qatnaşuı küzdä totılğan BMO klimat söyläşülärendä Parij kileşüen ğamälgä aşıru, êmissiya kimetü maqsatları, adaptaśiya tırışlıqları, klimatnı finanslaw häm uglerod bazarı mexanizmnarı qaralaçaq.
