İlbaşı Räcäp Tayyip Ärdoğan atnakiçen Änkarada ütkärelgän Ğailä häm mädäniyät-sänğät simpoziumında ğailä institutı aldında torğan awırlıqlarğa tuqtalıp uzdı.

Ärdoğan: “Censezläşterü kebek mäcbüri taläplärgä häm LGBT kebek bozıq ağımnarğa qarşı kiräkle böten çaralarnı küräbez, bu ölkädä iñ keçkenä taşlamağa, wayımsızlıqqa häm sülpänlekkä dä yul quymıybız”, - dip äytte.

İlbaşı Ärdoğan global kapitalizm yaña frontlar açqan, mädäni imperializm häm sanlı qamalış dönya külämendä qırıslığın arttırğan çorda Törkiyäneñ ğailä töşençäsenä zur ähämiyät birüen belderde.

Ärdoğan, ilneñ tuplam bala tabu tizlegeneñ uzğan yılda 1,48%qa töşüen kürsätüçe räsmi mäğlümatlärne telgä alıp, demografik krizis kisätüen yasadı häm: “Xäzerge waqıtta fäläkät aldında torabız”, - dide.

Ärdoğan: “Kiläçägebez cähätennän köçle qurqınıç qıñğırawları çıñlıy. Bu ilneñ kiläçägen uylawçı berkem dä moña bitaraf qala almayaçaq”, - dip äytte.

Ärdoğan may ayında İstanbulda oyıştırılğan Xalıqara ğailä forumındağı çığışında Törkiyäneñ 2026nçı-2035nçe yıllarnı “Ğailä häm xalıq sanı distä yıllığı”n iğlan itäçägen beldergän ide.

Ärdoğan, şäxsi uñaylıqların ğailä häm ictimaği bäyläneşlärdän östen kürüçe zamança yäşäw räweşen tänqitläp:

“Zamançalaşunı ğailäsezlek häm yalğızlıq kebek ike töşençägä nigezlägän añlayışnıñ şäxeskä dä, cämğiyätkä dä xozur birüe, tınıçlıq täêmin itüe mömkin tügel. Şäxsi komfortqa östenlek birüçe yäşäw räweşe yäşlärdän başlap, qızğanıç, cämğiyätneñ kapillyarlarına qädär tiz tarala”, - dip iskärtep uzdı.

Küp sanda il LGBT xäräkätenä qarşı çaralar kürde.

Rusiyä 2023nçe yılda “xalıqara LGBT xäräkäten” tıydı.

Soñğı waqıtlarda Macarstan (Vengriyä), Bolgariyä, Argentina, İndoneziyä häm Görcestan (Gruziyä) ğailä qimmätlären LGBT yoğıntısınnan saqlawnı maqsat itüçe çaralar kürde.

Şulay uq 30dan kübräk Afrika ile, 22 Aziyä ile, altı Amerika ile häm Okeanlıqta altı il censezläşterü taläplärenä qarşı qatği çaralar kürde.