Nigeriyä poliśiyäse sişämbe könne yasağan belderüdä ilneñ tön’yaq-könçığışında urnaşqan Mayduguri şähärendä intixar höcümçeläre tarafınnan başqarılğan berniçä şartlaw näticäsendä kim digändä 23 keşeneñ ğomere özelüen häm 100dän artıq keşeneñ yaralanuın citkerde.

Poliśiya süzçese Nahum Kenneth Daso bolay dide: “Berençel tikşerü näticäläre waqıyğalarnıñ intixar höcümçeläre tarafınnan başqarıluın kürsätä. Qızğanıç, barlığı 23 keşä hälaq buldı, 108 keşä törle däräcädä yaralandı.”

Düşämbe kiçendä bulğan şartlawlar, wäqalätlelär terrorçılarnı cawaplı dip sanagan häm yäkşämbe tönennän düşämbe irtäsenä qadär xärbi bülekçägä höcümnän soñ buldı.

Höcümnär köçäyä

Terror oyışması “Boko “Xaram” häm anıñ köndäşe Könbatış Afrikadağı “DEAŞ”nıñ  (ISWAP) äğ’zaları soñğı waqıtta Nigeriyäneñ tön’yaq-könçığışında höcümnären arttırdı.

İldä 16 yıl däwam itkän terror ğämälläre 40 meñnän artıq keşeneñ ülemenä häm yaqınça 2 million keşeneñ küçenüenä kiterde.

Düşämbe könne şähär xastaxanäsendä bulğan AFP xäbärçese düşämbedäge şartlawlarda yaralanğan distälägän keşeneñ däwalanuın häm trotuarda cäymä belän qaplanğan küp sanda cäsäd kürüen citkerde.  

Poliśiya sişämbe irtäsendä yasağan belderüdä zıyan kürgän töbäklärdä wäzğıyät’neñ cayğa salınuın häm iminlek köçläreneñ Mayduguri häm anıñ tiräsendä küzätüne köçäytüen citkerde.