Rusiyäneñ cirle wäqalätleläre düşämbe könne Rusiyäneñ kön’yağında ber neft saqlağıçınıñ keşesez hawa apparatı höcümennän soñ yana başlawın belderde.

Töbäk xakimiyätläre höcümnän soñ Krasnodar töbägendä urnaşqan Labinsk şähärendä ber saqlqağıçqa ut qabuın citkerde. Waqıyğada yaralanu oçraqları terkälmägän. Ğadättän tış xäl törkemnäre yanğınnı kontrol astına alırğa tırışa. Zıyan küläme turında tögäl mäğlümat birelmäde.

Töbäk, Rusiyäneñ ênergetika häm xärbi asqormasına qarşı kiñäyüçe hawa xäräkätläreneñ ber öleşe bularaq, Ukraina keşesez hawa apparatları tarafınnan berniçä tapqır utqa totıldı. Ütkän atnada Tixoretsk yanındağı ber yağulıq obyektına, Afipski neft’ êşkärtü urınına häm Kafkaz Portı yanındağı obyektlarğa höcümnär oyıştırıldı.

Rusiyä Ukrainanıñ atna azağında Mäskäwgä qarşı iñ zur keşesez hawa apparatı höcümnäreneñ bersen başlawın äytte. Mäskäw şähäre başlığı Sergey Sobyanin hawa saqlanu sistemasınıñ küpsanlı “kamikadze” keşesez hawa apparatı dulqınnarına cawap birüe belän ike kön êçendä 100dän artıq keşesez hawa apparatı totqarlanuın xäbär itte. TASS xäbär agentlığına qarağanda, Rusiyäneñ saqlanu ministrlığı tön däwamında, kimendä, 145 keşesez hawa apparatı bärep töşerelüen, alarnıñ 53e Mäskäw töbägendä buluın äytte.

Höcümnär waqıtında şähärneñ zur aêroportlarında oçışlar waqıtlıça çiklänä.

Ukraina däwlät başlığı Volodimir Zelenskiy yäisä başqa Ukraina wäqalätleläre höcümnär turında açıqlaw yasamadı.

Ukraina söyläşülärgä äzer

Zelenskiy, AQŞnıñ suğışnı tögälläw öçen Amerika cirendä Rusiyä belän öçyaqlı oçraşu täqdim itüen äytkän ide. Kievta yäkşämbe könne yasağan çığışında ul oçraşunıñ kiläse atnağa küçerelüen belderde.

Zelenskiy: “Bu xäl suğış belän bäyle. Alar [Amerikalılar] Amerikada söyläşergä äzer. Bez dä äzer buluıbıznı äyttek. Ruslar Amerikağa barırğa äzer tügel. Şuña kürä amerikalılarnıñ cawabın kötäbez,” - dide. Ukraina citäkçese, Vaşington yäisä Mäskäw başqa ber urın täqdim itsä, Kievnıñ başqa ber ildä dä söyläşülärgä açıq buluın östäde.