AQŞ ilbaşı Donald Tramp, ägär dä Afrikanıñ iñ küp xalıqlı ile bulğan Nigeriyada xristiannarnı üterü tuqtatılmasa, AQŞ köçlären cibärü belän yanadı.

Şimbä könne “Truth Social” platformasında Tramp kisken belderü yasap, Pentagonğa höcüm planın äzerlärgä quşuın äytte. Ul Nigeriyada xristianlıqnıñ "yuk itelü yanawı" astında buluın citkerde.

"Ägär Nigeriya xökümäte alğa taba da xristiannarnı üterergä röxsät itsä, AQŞ şunda uq barlıq yärdäm häm yaqlaw programmaların tuqtataçaq häm şunnan soñ "abruyın yuğaltqan ilgä" qorallanğan räweştä kerüe mömkin” - dide ul.

"Min xäzer suğış ministrlığına höcüm ixtimalı öçen äzerlänergä boyıram. Ägär bez höcüm itsäk, ul tiz, qatı häm näticäle bulaçaq, näq terrorçılar bezneñ QÄDERLE xristiannarıbızga höcüm itkän kebek," dip östäde ul.

Ul üz yazmasın "KİSÄTÜ: NIGERIYÄ XÖKÜMÄTE TIZ XÄRÄKÄT ITSÄ, YAXŞI BULIR!" dip tämamladı.

Nigeriyada, belgeçlär äytüençä, törle konfliktlar bara. Bu bäreleşlärdä xristiannar da, möselmannar da berdäy üterelä.

Tramp comğa könne urtaqlaşqan ber yazmasında "meñlägän xristiannıñ üterelüen" alğa sörde häm qayber radikallarnıñ bu "massaküläm ütereş" öçen cawaplı buluın äytte.

Nigeriyada xristiannarnıñ êzärleklänüe turındağı däğwalar da bar. Anda êtnik, dini häm töbäk büleneşläre ütkändä dä ülemçel waqıyğalar kiterep çığardı, bügenge säyäsätkä dä täêsir itä.

Nigeriyä xalqı tigez räweştä diyärlek möselmmannar häm xristiannardan tora. Möselmannar kübräk - tönyaqta, xristiannar isä könyaqta yäşi.