AQŞ ilbaşı Donal'd Tramp AQŞnıñ NATO belän Grenlandiya turında söyläşülär alıp baruın häm töbäktäge Arktika cirläreneñ AQŞ milli iminlege öçen bik möhim buluın assızıqladı.

Ul comğa könne jurnalistlarğa: “NATO bezneñ belän Grenlandiya turında söyläşä. Milli qurqınıçsızlıq öçen  Grenlandiya bezgä bik kiräk. Ägär bez moña ireşmäsäk, milli iminlektä zur buşlıq barlıqqa kiläçäk”,- dide ul.  

Tramp xärbi yäki qurqınıçsızlıq iniśiativaları turında täfsilläp söylämäsä dä, Vaşingtonnıñ bu mäs’älädä ittifaq belän aktiv êlemtädä toruın belderde häm “Bez NATO belän söyläşülär alıp barabız” dip äytte.

Comğa irtäsendä Tramp Grenlandiyägä qarata AQŞ mänfäğatlärenä qarşı çıqqan illärgä tamğaxanä salımnarı kertergä uylawın belderde.  

Tramp êlegräk Franśiya ilbaşı Êmmanuêl Makron belän uzğan häm Franśiyädä daru bäyälären kütärü öçen 25% külämendäge tamğaxä salımı kertü belän yanağan oçraşunı küzdä totıp, “Min monı Grenlandiya öçen dä êşli alam” dide.

Aq Yortta uzdırılğan çarada Tramp: “Ägär illär Grenlandiya mäs’äläsendä taläplärne ütämäsälär, min alarğa salımnar kertä alam, çönki milli qurqnıçsızlıq öçen Grenlandiya bezgä bik  kiräk”, — dip äytte.

Uzğan atnada Tramp Rusiyä yäki Qıtaynıñ Daniyägä bäyle üzidaräle töbäkkä yoğıntı yasawın buldırmas öçen AQŞnıñ Grenlandiyäne üz kontrolenä aluı kiräklegen beldergän ide.