Süriyä comğa könne İzrail armiyäseneñ Dimäşq tiräsendäge Bäyt Cin qalasına yasağan basqının “cinayätçel höcüm” dip ğayepläde häm älege basıp kerü belän annan soñğı hawa höcümnären suğış cinayäte bularaq bäyäläde.

Süriyä tışqı êşlär ministrlığı beldergänçä, İzrail xärbi patrule Bäyt Cin arqılı Süriyä territoriyäsenä kerde häm anda cirle xalıq belän oçraştı, “tınıç xalıqqa häm alarnıñ milegenä höcum itte”, bu isä bäreleş kiterep çığardı häm patrul çığarga mäcbür buldı.

Belderüdä basqınnan soñ İzrail köçläreneñ qalağa “maqsatlı häm räximsez” hawa höcümnäre başlawı häm bu höcümnärneñ “tulı qanlı suğış cinayäte” buluı äytelde.

Süriyä däwlät mäğlümat çaralarına kürä, comğa irtän İzrailneñ höcümnärendä, kimendä, 13 keşe, şul isäptän, xatın-qızlar häm balalar, üterelgän, şul qadär ük keşe yaralangan.

İzraill armiyäse beldergänçä, bäreleş waqıtında altı İzrail ğaskäriye yaralangan, öçese awır xäldä.

Alar “Jaama Islamiya” oyışması äğzaların totqarlawın, bu keşelärneñ Bäyt Cin tiräsendä êşçänlek alıp baruların häm İzrail watandaşlarına qarata höcümnär oyıştıruın da citkerde.

İzraill armiyäse noyabr' ayında Süriyäneñ könyağında 47 basqın ütkärgän.

2024nçe yılnıñ azağında Başar äl‑Assad rejimınıñ töşüennän soñ İzrail Süriyäneñ Golan tawların basıp aluın kiñäytep, qoralsızlandırılğan bufer zonanı üzenä aldı. Bu adım Süriyä belän 1974nçe yılda imzalanğan Köçlärne ayıru kileşüen bozu bulıp sanala.