AQŞ İlbaşı Donald Tramp yäkşämbe könne Amerika köçläreneñ İrannıñ barlıq xärbi-diñgez korabların batıruın häm raketalar cibärü platformalarınıñ kübesen yuq itüen belderde.

“Fox News” kanalına birgän intervyusında Tramp AQŞ operatsiyäläreneñ İrannıñ xärbi mömkinleklären sizelerlek qaqşatuın äytte.

"Bez İrannıñ barlıq sudnoların batırdıq häm raketalar cibärü platformalarınıñ kübesen yuq ittek, yaqınça 20 protsentı ğına qaldı", - dide ul.

AQŞ İlbaşı, şulay uq, İranğa qarşı suğışnı tuqtatu qararın İzrail xökümäte räise Binyamin Netanyaxu belän bergä qabul itäçägen äytte.

Aq Yort comğa könne suğışnıñ yaqınça dürt-altı atna däwam itäçägen farazlawın belderde, läkin soñğı atnada bu kürsätkeç üzgärde häm Tramp suğışnıñ tögäl waqıtın birüdän baş tarttı.

AQŞ häm İzrail 28 fevraldä İranğa zur külämle höcüm başlağannan birle töbäktäge kiyerenkelek arttı, höcüm näticäsendä 1200dän artıq keşe, şul isäptän, Yuğarı lider Ayätulla Ali Xamaney, 150 dän artıq uquçı qız bala häm yuğarı däräcädäge xärbi wäqalätlelär hälaq buldı.

İran AQŞ bazalarına, diplomatik qorılmalarına häm töbäktäge ğaskärlärenä, şulay uq, küp sanlı İzrail şähärlärenä qarşı kiñ qolaçlı cäwap höcümnäre yasadı. Kimendä altı AQŞ ğaskäriye hälaq buldı.

İrannıñ dron häm raketa höcümnäre däwam itä. Xäbärlärgä qaraganda, Tähran İzrailgä berniçä tapqır kassetalı bombalar cibärgän.

Yäkşämbe könne İrannıñ belgeçlär şurası Müctäba Xamaneynı ilneñ yaña yuğarı liderı itep saylawın iğlan itte. Ul ätise Ali Xamaney urınına kilde.

“ABC News”qa intervyuda Tramp yäş Xamaneynıñ "ozaq yaşämäyäçägen" äytte.

"Aña bezneñ xuplawıbıznı alırğa turı kiläçäk", - dide AQŞ İlbaşı. "Ägär ul bezneñ xuplawıbıznı almasa, ozaq yaşämäyäçäk”