"Ormuz buğazı bezneñ kontroldä"

AQŞnıñ Tähranğa höcüm itü qurqınıçı däwam itkändä İran Ormuz buğazınıñ tulısınça üz kontrolendä buluın belderde.

“Fars” xäbär agentlığı citkergänçä İnqıylap saqçıları citäkçese Möxämmäd Äkbärzadä: "İran suğış telämi, läkin suğışqa tulısınça äzer. Suğış başlansa, ber millimetr da çigenü bulmayaçaq häm İran alğa baruın däwam itäçäk", — dide.

Äkbärzadä bu strategik üzgäreş idaräseneñ ğädäti ısullardan tış buluın häm xäzer tulısınça aqıllı xälgä kilüen äytep, monıñ İranğa barlıq diñgez, öslek häm su astı xäräkätlären özleksez küzätep barırğa mömkinlek birüen bilgeläp ütte.

Äkbärzadä: “İran şulay uq törle bayraqlar yörtüçe qorablarnıñ buğazdan ütü-ütmäwe turındağı qararlarnı da kontrol itä,” - dip belderde. Ul İrannıñ global iqtisadnıñ zıyan kürüen telämäwen läkin AQŞ häm berlektäşläre başlatqan suğıştan fayda kürülärenä yul quymayaçağın äytte.

Äkbärzadä kürşe illärneñ cir öste, hawa kiñlege yäki suları İranğa qarşı qullanılğan oçraqta bu illärneñ doşman bularaq bäyälänäçäge turında kisätte.

“Bu yullama töbäktäge yaqlarğa cibärelde inde,” - digän İran komandirı, Tährannıñ yaraşlı waqıtta iğlan iteläçäk östämä mömkinleklärgä dä iyä buluına basım yasadı.

Könbatış qultığı belän Oman qultığı arasındağı tar su yulı bulğan Ormuz — bigräk tä Yaqın Könçığıştan kilüçe neft belän ber rättän global' neft häm sıyıqlaştırılğan tabiği gaz säwdäseneñ iñ möhim yünäleşe bulıp tora.

Dönyadağı diñgez yulı belän taşıla torğan êşkärtelmägän neftneñ öçtän ber öleşe bu buğaz aşa uza.

Ormuz buğazı aşa kön sayın taşıla torğan 20 million miçkä neft häm neft produktlarınıñ zur öleşe Qıtay belän bergä Aziya bazarlarına barıp citä. İran nefteneñ zur öleşe dä bu su yulı aşa Qıtayğa êksportlana.