Qıtay qamaw astındağı Fälästin töbäge Ğazzädäge xäzerge xälgä tirän borçılu belderde häm İzrailne kiyerenkelekne köçäytüdän saqlanırğa çaqırdı.

Tışqı êşlär ministrlığı süzçese Mao Nin comğa könne Pekinda jurnalistlarğa yasağan belderüendä:
“Bez tınıç xalıqqa zıyan kiterä häm xalıqara xoquqnı boza torğan  barlıq ğamällärgä qarşı”,-dide.
Ul Ğazzädä ber kön êlek 15 fälästinleneñ ülemenä kitergän İzrail hawa höcümnärenä cawap itep bolay dip östäde:
“Qıtay Ğazzädä utnı tuqtatu kileşüeneñ tulısınça ütälüenä, gumanitar krizisnıñ ciñeläyüenä häm iñ qısqa waqıtta totrıqlılıqnıñ  torğızıluına ömet itä”.

Mao, bigräk tä İzrailne küzdä totıp, bäyläneşle yaqlarnıñ kiyerenkelekne tağın da köçäyüennän saqlanırğa tiyeşlegen  assızıqladı.

Fälästinneñ räsmi xäbär agentlığı “Wafa” beldergänçä, utnı tuqtatu kileşüenä qaramastan, pänceşämbe irtäsennän birle Ğazzädä İzrail hawa höcümnärendä kim digändä 15 fälästinle, şul isäptän 5 bala, hälaq bulğan.

Fälästin sälamätlek saqlaw räsmiläre İzrailneñ Ğazzä külämendä küçenep yörgän keşelär sıyınğan çatırlarğa, yortlarğa häm ber mäktäpkä höcüm itüen belderde.

Ğazzä sälamätlek saqlaw ministrlığı isä 10 nçı oktyabr’dä köçenä kergän utnı tuqtatuğa qaramastan, İzrail tarafınnan anı bozular däwam itüen häm näticädä 425 fälästinleneñ hälaq buluın, 1 206 keşeneñ yaralanuın xäbär itte.