Qazaqstan ilbaşı Qasıym-Comart Toqayev, Rusiyä däwlät başlığı Vladimir Putin belän oçraşıp, Ukrainadağı nizağnı tuqtatu häm möhim näticälärgä ireşep bulğan "İstanbul formulası 2.0"ğa qaytırğa çaqırdı. Kreml isä Kiyev citäkçelegeneñ totışı arqasında bu täqdimneñ mömkin bulmawın belderde.
Toqayev, şimbä könne Rusiyäneñ Omsk şähärendä Putin belän ütkärgän oçraşuında, Qazaqstannıñ däwam itüçe konflikt çitendä bulmawın, läkin aradaşçılıq rolen başqarmayaçağın äytte. Toqaev "zur il" dip atağan Rusiyäneñ problemalarnı berüze xäl itäçägenä ışanuın citkerde.
Toqayev: "Bälki dä bu nizağ tuqtarğa häm möhim näticälärgä ireşep bulğan “İstanbul formulası 2.0”ne çınğa aşırırğa kiräk. Şunnan soñ, tabiğıy räweştä, Rusiyäne dä kertep zur däwlätlärneñ garantiyaläre astında küptännän kötelgän tınıçlıqqa taba atlıy alabız," – dide.
Toqayev “däwlätara suğış” dip atağan nizağqa qarata Awrupa häm Amerika Quşma Ştatlarınnan küp sanlı yullama aluın äytte.
Qazaq liderı ayıruça Putinnıñ ütkän yıl avgust ayında Alyaskada AQŞ liderı Donald Tramp belän ütkärgän söyläşüdä kürsätkän “diplomatik sığılmalılıq”nı maqtadı.
Kreml Qazaqstan ilbaşınıñ Rusiyä-Ukraina suğışın tuqtatu täqdimeneñ mömkin bulmawın citkerde.
Rusiyä däwlät xäbär agentlığı “TASS”nı da kertep Rusiya matbuğatında çıqqan xäbärlärgä qarağanda Kreml süzçese Dmitriy Peskov: "Suğışnı bu räweştä tuqtatu mömkin tügel", — dip äytte.
Peskov, Rusiyanıñ konfliktnı beterü öçen quyğan şartlarınıñ açıq buluın häm Ukraina tiyeşle qararlarnı qabul itkän oçraqta suğışnıň kiç citkänçe tämamlana alaçağın belderde.
Peskov Mäskäw citäkçelegeneñ taläplärenä işarät itte: alar - Ukrainanıñ Donbass töbägennän çığuı häm Kiyev citäkçelegeneň NATOğa kerü planlarınnan baş tartuı.
Peskov: "Bezneñ öçen töp şart bar: maqsatlarıbızğa ireşergä tiyeşbez", — dide.
