Törkiyä ilbaşı ilbaşı Räcäp Tayyip Ärdoğan Qorban bäyräme uñayınnan videomöräcäğat’ yasadı.
Ärdoğan üz möräcäğatendä bu izge könnärneñ ilebez, qäderle xalqıbız, İslam ğaläme häm barlıq keşelekkä bäräkät kiterüen teläp üz çığışında küp kenä könüzäk mäs’älälärgä dä tuqtaldı.
Ärdoğan töbäktäge bäreleşlärneñ täêsiren tübändäge süzlär belän açıqladı: “Bez İslam dönyası bularaq bäyräm şatlığın kiçersäk tä, ikençe yaqtan töbägebez häm dönya yuğarı stress çorı kiçerä. İzrail, utnı tuqtatuğa qaramastan, Ğazzädän Yordannıñ könbatış üzänlegenä, Könçığış Qodüstän Livanğa qadär törle cirlärdä basıp alu, cimerü, küpläp üterü häm qanunsız kilep urnaşu êşçänlegen däwam itä. İzrailneñ provokaśiyäläre häm plannarı arqasında kilep çıqqan suğışnıñ tiskäre yoğıntısı ênergiyädän awıl xucalığına, säwdädän transportqa, iq’tisadtan iminlekkä qadär küp tarmaqta sizelä.
Töbägebez suğışlar häm krizislar belän köräşkän bu çorda Törkiyä üzeneñ iqtisadı, infrastrukturası, täcribäle oyışmaları, sälätle kadrları häm iñ möhime – nıqlı êçke frontı belän totrıqlılıq utrawı bularaq küzgä taşlana. Tänqıyt’lärgä häm kirtälärgä qaramastan, 23 yıl buyı alıp barğan säyäsätlärebezneñ cimeşlären, berençe çiratta saqlanu sänäğatebezdä bulu belän bergä, här ölkädä küräbez. İqtisadi küläm 238 milliard dollardan 1,6 trillion dollarnı uzıp kitte, yıllıq êksport 36 milliard dollardan 276 milliard dollarğa citte, saqlanu häm aviaśiya êksportı 248 million dollardan 10 milliard dollarnı uzıp kitte. Törkiyä mondıy kürsätkeçlär belän dönyada siräk oçrıy torğan uñışlarğa ireşte”.
Ärdoğan Törkiyäneñ terrorçılıqqa qarşı köräştäge tırışlıqlarına da tuqtalıp bolay dide: “Äylänä-tiräbezdäge qara bolıtlar taralğaç, inşalla, yaña çornıñ iñ yaqtı yoldızlarınıñ berse bezneñ Törkiyä bulaçaq. Bez mоñıñ öçen kiräkle bar närsäne dä êşlibez.
İlebezneñ kiläçäge häm töbägebezneñ totrıqlılığı öçen strategik ähämiyäte bügenge köndä tağın da yaxşıraq añlaşıla torğan “Terrorsız Törkiyä” prośessı şularnıñ berse. Bez çiklärebezdä tınıçlıq häm iminlekne nığıtuğa, çiklärebez tışında imperialistik uyınnarnıñ bozıluına öleş kertkän bu tarixi prośessnı bik zur iğ’tibar belän , aqıllı fiker yörtep häm ixlaslıq belän üz maqsatına taba alıp barabız. Törkiyägä iqtisadi yaqtan 2 trillion dollarğa töşkän bu afättän xalqıbıznı qotqaru qararıbız qatğıy. Bez nıqlı adımnar belän yulıbıznı däwam itäbez”.
