Donal’d Tramp İzrail belän “Xamas”nıñ uzğan atnalarda täq’dim itelgän Ğazzä kileşüeneñ berençe êtabın qabul itüen häm bu qısada barlıq İzrail äsirläreneñ irekkä cibäreläçägen äytte.
Tramp çärşämbe könne “Truth Social”da yasağan belderüendä bolay dide:
“İzrail belän “Xamas”nıñ bezneñ Tınıçlıq planıbıznıñ berençe êtabın qabul itülären ğorurlanıp citkeräm”.
AQŞ ilbaşı bolay dip östäde:
“Bu — barlıq äsirlärneñ yaqın arada irekkä çığarılaçağın häm İzrailneñ köçle, daimi häm mäñgelek tınıçlıqqa taba berençe adım bularaq kileşengän liniyägä çigeneçägen añlata”.
Tramp barlıq yaqlarğa ğadel mönäsäbät kürsäteläçägen belderde häm bu mizgelne Ğaräp häm möselman dön’yası, İzrail, tirä-yaq illär häm AQŞ öçen böyek kön dip atadı.
Misır däwlät küzläw xezmätläre belän bäyle bulğan “Al-Qahera News” kanalı:
“Ğazzädä utnı tuqtatu kileşüeneñ berençe êtabın gamälgä quyuğa qağılışlı barlıq şartlar häm mexanizmnar turında bu tön kileşügä ireşelde”,- dip xäbär itte.
“Xamas” rasladı
Belderüdän soñ “Xamas” kileşüne qabul itüen citkerde häm Qatar, Misır häm Törkiyägä tırışlıqları öçen räxmät äytte.
“Xamas” Telegramda urnaştırğan belderüendä bolay dide:
“Xamas” Ğazzägä qarşı suğışnı tuqtatunı, basıp aluçılarnıñ çigenüen, gumanitar yärdäm kertüne häm äsirlär belän almaşunı täêmin itkän kileşügä ireşelüen iğ’lan itä”.
Belderüdä şulay uq bolay diyelä:
“Qatar, Misır häm Törkiyädäge aradaşçı qardäşlärebezneñ tırışlıqları öçen bez räxmätle. Şulay uq AQŞ ilbaşı Donal’d Trampnıñ suğışnı tuqtatu häm basıp aluçı İzrail köçläreneñ Ğazzä sızığınnan tulısınça çigeneüe öçen kürsätkän tırışlıqların da yuğarı bäyälibez”.
Netan’yaxu “äxlaqıy ciñü” iğ’lan itte
Netan’yaxu xökümätne irtägä cıyıp kileşüne raslayaçaqların häm äsirlärne kire qaytaraçaqların belderde.
Netanyaxu, Trampnıñ belderüennän soñ yasağan belderüendä bolay dide:
“İzrail öçen böyek kön. Bu kileşü İzrail öçen diplomatik uñış häm äxlaqıy ciñü”.
Ul Ğazzädäge xärbi operaśiyälärneñ şuşı “borılış noqtası”na ireşüdä möhim rol’ uynawın assızıqladı.
İke yıl däwam itkän genośidtan soñ kileşü
Trampnıñ belderüe İzrailneñ Ğazzägä qarşı başlağan genośidınıñ ike yıllığına ber kön qala yasaldı.
İzrail soñğı ike yılda kübese xatın-qızlar häm balalar bulğan 67 meñnän artıq fälästinlene üterde.
Belgäçlär bu sannıñ tağın da kübräk buluın äytä.
İzrail blokada astındağı töbäkneñ zur öleşen cimerde häm böten xalıqnı diyärlek küçenergä mäcbür itte.
