Törkiyä tışqı êşlär ministrı Xakan Fidan İranğa qarşı hawa höcümnäreneñ xökümätne bärep töşerügä kiterämäyäçägen belderde, xärbi çaralar rejimnı alıştıruğa kiterergä mömkin digän süzlärne kire qaqtı.
Düşämbe könne “CNN Türk” kanalına birgän intervyusında İran xökümäten bärep töşerü maqsatı belän höcüm itsälär, bärep töşereläçäkme digän sorawğa Fidan: "Yuq, ul bärep töşerelmäyäçäk", - dip cawap birde.
"Min İrandagı konkret ssenariylarnı telgä alırğa telämim, läkin hawa höcümnäre yaki başqa närsälär belän rejimnı alıştırıp bulmayaçaq. Bu - buş xıyal", - dide ul.
Fidan: “Xärbi çaralar däwlätne köçsezländärergä mömkin, läkin rejimnı alıştıruğa kitermäyäçäk”,- dip östäde.
"Şulay bulırğa mömkin: xökümät köçsezlänä, sistema köçsezlänä häm ul xalıqqa xezmät kürsätä almıy başlıy. Şunnan soñ ğamäldäge rejim küpkä radikal'räk qararlar qabul itärgä häm, bälki, tözätmälär kertergä mömkin. Ul üzgärergä mömkin", - dide ul.
Änkaranıñ diplomatik marafonı
Bu belderülär İran häm AQŞ, yaqınça sigez aylıq tänäfestän soñ, comğa könne Omanda yañadan başlanğan söyläşülärgä äzerlängändä yasaldı.
İran tiräsendäge kiyerenkelekneñ xalıqara kön tärtibendä östenlek itüen assızıqlap, tışqı êşlär ministrı töbäkneñ tağın ber konfliktnı kütärä almayaçağı turında kisätte.
"Bezneñ ilbaşı Räcäp Tayyip Ärdoğan da bu mäsälädä bik sizger. Şuña kürä bez suğışnı buldırmaw öçen barlıq çaralarnı da qullanırğa telibez", - dide ul.
Fidan İran tışqı êşlär ministrı Abbas Araqçinıñ söyläşülär turında mäğlümat citkerüen häm Änkaranıñ da AQŞ yağı belän êlemtädä toruın belderde.
Xaqan Fidan: "Wäzğıyätne tiz arada xäl itü awır" di, şulay da, yaqlar arasında söyläşülärne däwam itärgä teläk buluın assızıqlıy.
"Xäzerge waqıtta suğış qurqınıçı kürenmi kebek", - dide Fidan, söyläşülär işege açıluına basım yasap.
