Tön’yaq Kipr Törek Cömhüriyäte watandaşları yäkşämbe könne ilbaşı saylawınıñ berençe turında qatnaşaçaq.

Tawış birü xoquqına iyä 218 meñ 313 saylawçı 8 namzättän bersen saylayaçaq.

Xäzerge ilbaşı Ärsin Tatar bäysez namzät bularaq qatnaşa, ä töp oppoziśiya bulğan Cömhüriyätçe Törek partiyäse liderı Tufan Ärhürman üz partiyäseneñ räsmi namzäte sıyfatında köç sınaşa.

Berençe turda Xösäyen Gürläk, Mäxmät Hasgülär, Arif Salix Kırdağ, Äxmät Boran häm İbrahim Yazıcı bäysez namzät bularaq qatnaşa, ä Osman Zorba Kipr Sośialist partiyäsen wäkillek itä.

Berençe turda tawışlarnıñ 50%tan kübrägen cıyğan namzät ilbaşı dip iğ’lan iteläçäk.

Ägär berkem dä absolyut küpçelekkä ireşä almasa, berençe turda iñ küp tawış cıyğan ike namzät ikençe turğa çığaçaq häm atna êçendä uzaçaq bu tur näticälärenä kürä yaña ilbaşı bilgelänäçäk.

İkençe turda iñ küp tawış alğan namzät ilbaşı bulaçaq.

Namzätlär kampaniyälären şimbä könne cirle waqıt belän 18.00 säğat’kä qadär däwam itä ala.

Ärsin Tatarnıñ maqsatı - qabat saylanu

Tön’yaq Kipr Törek Cömhüriyäte ilbaşı xalıq tarafınnan biş yılğa saylana häm wazıyfa başqaru waqıtı çiklänmägän.

Rauf Raif Denktaş 1985 yıldan 2005 yılğa qadär Tön’yaq Kipr Törek Cömhüriyäten citäkläde häm barlıq saylawlarda bäysez namzät bularaq qatnaştı.

2000 yılda Milli Berdämlek partiyäse namzäte Därviş Äroğlu yarıştan çigengäç, Denktaş berdänber namzät bularaq tağın ilbaşı bulıp saylandı. Ul 2005 yılğı ilbaşı saylawında qatnaşmadı.

2005 yılda Mäxmät Ali Talat tawışlarnıñ 55,59%ın alıp ilbaşı buldı.

2010 yılda Därviş Äroğlu 50,35% tawış belän ciñü yawladı.

2015 yılda Mostafa Aqıncı ilneñ dürtençe ilbaşı buldı, ä xäzerge ilbaşı Ärsin Tatar 2020 yılda bişençe ilbaşı itep saylandı.