Şimbä könne AQŞnıñ elekkege ilbaşı Barak Obama Minnesotadağı İmmigratsiyä häm tamğaxanä xezmäte ğämällären ğayepläde, alarnıñ tärtiben "diktaturalarda" küzätelgän ğamällär belän çağıştırdı.

Tramp administratsiäse cinayätçelärgä qarşı maqsatçan çaralar dip atagan operatsiyädä meñlägän federal’ agentlar, şul isäptän, migratsiyä xezmäte agentları, atnalar buyı kiñ qolaçlı reydlar häm qulğa alular ütkärde häm ul bu atnada tämamlandı.

Obama uzğan ayda agentlarnıñ ğamällären tänqıytläde, alarnı qanunsız dip atadı, läkin şimbä könne säyäsi spiker Brayan Tayler Koên belän äñgämädä tağın da alga kitte: "Federal’ xökümät xezmätkärläreneñ qanunısız ğamälläre bik borçu turdıruçı häm qurqınıç",-dide.

Obama federal’ türälärneñ ğamällären, şul isäptän, ilbaşı Donald Trampnıñ massaküläm çaralarına basımnı köçäytkän ike ülemgä kitergän atunı "êlek avtoritar illärdä häm diktaturalarda kürelgän tördän" dip atadı.

Şulay da, AQŞ tarixtındağı berdänber qara tänle ilbaşı Obama, operatsiyälärgä qarşı torğan cämğıyätlärdä ömet kürüen äytte: "Ğadättän tış qına tügel, ä sistemalı räweştä, oyışqan räweştä, grajdannаr "bu bezneñ Amerika tügel" dip, döreslekne, kameralarnı häm tınıç protestlarnı qullanıp köräşälär"-dide ul.

Obama bolay dip östade: "Nul’dän tübän temperaturada ğadi keşelärneñ mondıy batırlıq, totrıqlı tärtibe bezgä ömet birergä tieş. Minemçä, mondıy keşelär bulğanda, bez ciñäçäkbez".

Trampnıñ wäkile Tom Xoman pänceşämbe könne Minnesotadağı zur protestlar häm il külämendä açu tudırğan agressiv immigratsiyä operatsiyäse tämanlanuın iğlan itte.

Kiñ qolaçlı podkast intervyuında Obama, şulay uq, Trampnıñ üzen häm anıñ xatını Mişel’ne maymıllar itep sürätlägän sotsial’ media postına berençe tapqır cawap birde.