Tramp ilbaşı Maduro häm xatının Venesuêladan mäcbüri alıp çığuların äytte
İlbaşı Tramp däwlät başlığı Maduro häm xatınınıñ Venesuêladan uñışlı AQŞ operatsiyäse belän çığarıluın citkerde. Bu operatsiyä kiñ külämle xärbi höcüm waqıtında tormışqa aşırıla.
AQŞ ilbaşı Donald Tramp şimbä könne Vaşingtonnıñ Venesuêlağa qarşı "zur külämle höcüm" oyıştıruın häm däwlät başlığı Nikolas Maduro belän xatının qulğa alıp ildän çığarıluların äytte.
İlbaşı Tramp, "Truth Social" dip atalğan sotsial’ çeltär platformasında yasağan belderüendä: "Amerika Quşma Ştatları Venesuêlağa häm anıñ liderı - däwlät başlığı Nikolas Maduroğa qarşı uñışlı räweştä zur külämle höcüm oyıştırdı, ul häm xatını qulğa alındı häm ildän çığarıldı", — dip belderde.
Tramp, xärbi basqınnıñ "AQŞ xoquq saqlaw oyışmaları belän xezmättäşlektä" tormışqa aşırıluın äytte.
AQŞ ilbaşı centekle mäğlümatlarnıñ soñraq açıqlanaçağın häm matbuğat konferensiyäseneñ Florida ştatındağı Mar-a-Lago rezidențsiyäsendä säğat 11.00dä ütkäreläçägen belderde.
İkençe yaqtan, "New York Times" (NYT) gazetı belän qısqa telefon äñgämäse ütkärgän Tramp, höcümneñ uñışlı uzuın maktadı.
“NYT” yazuınça, Tramp: "Bik yaxşı planlaw häm bik, bik yaxşı ğaskärlär, şäp keşelär bar ide. Çınlıqta bu yalt itkän operatsiyä buldı", — dide.
Operatsiyä öçen Kongress röxsäten sorağanmı-yuqmı häm Venesuêla öçen alda närsä kötelüe turındağı sorawlarğa cawap itep Tramp, bu mäsälälärne matbuğat konferențsiyäsendä kütäräçägen äytte.
Maduro AQŞ totqında
AQŞ däwlät särqatibe urınbasarı Kristofer Landau “Maduronıñ, nihayät, üz cinayätläre öçen ğadälät aldında cawap biräçägen" äytte.
Landau, "X" dip atalğan AQŞ sotsial’ çeltärendäge yazmasında: "Venesuêla öçen yaña tañ! Zalim kitte. U, nihayät, üz cinayätläre öçen ğadälät aldında cawap biräçäk", — dide.
Höcümnär AQŞ Maduronıñ narkotik kontrabandası belän bäyle buluın alğa sörgän häm aylar buyı däwam itkän kiyerenkelektän soñ başqarıldı.
"CBS News", wäqalätlelärgä sıltama belän, Maduronı qulğa alu operatsiyäsen AQŞ armiyäseneñ saylap alınğan maxsus köçläre — "Delta Force" berämlege ütkärüen xäbär itte.
AQŞ senatorı Mayk Li däwlät särqatibe Marko Rubionıñ aña Maduronıñ AQŞta cinayät gäyepläwläre buyınça xökem itü öçen qulğa alınuı turında mäğlümat birüen äytte.
Li beldergänçä, Rubio "Maduro xäzer AQŞ küzätüe astında bulğanlıqtan, Venesuêlada başqa xäräkätlär kötelmäwe" turında äytkän.
Süz uñayınnan, Venesuêla ilbaşı urınbasarı Delsi Rodrigez Maduronıñ qayda buluın belmäwlären citkerde, Tramptan "Däwlät başlığı Maduronıñ isän buluına dälillär" taläp itte.