Tışqı êşlär ministrı Xaqan Fidan pänceşämbe könne yasağan belderüendä Törkiyä ilbaşı Räcäp Täyyip Ärdoğannıñ Ğazzädä iminlekneñ totrıqlı xälgä kiterelüe häm töbäkneñ torğızıluı mäs’äläsendäge qatğıylığınıñ däwam itüen äytte.

Fidan bu belderülärne AQŞ ilbaşı Donal'd Tramp räislegendä Vaşingtonda Tınıçlıq şurasınıñ açılış cıyılışında yasadı.

Fidan: “İke yıllıq ğazaplardan soñ, AQŞ ilbaşı Donal'd Trampnıñ şäxsi qatnaşuı häm urtaq tırışlıqlarıbız näticäsendä Ğazzädä utnı tuqtatu täêmin itelde”, – dide.

Tışqı êşlär ministrı: “Läkin gumanitar xäl äle dä totrıqsız häm utnı tuqtatunı bozular däwam itä. Şuña kürä tiz, koordinaśiyälängän häm näticäle cawap birü bik möhim”, – dip östäde.

Fidan: “Törkiyä ilbaşı Räcäp Täyyip Ärdoğan Ğazzädä iminlekne totrıqlı xälgä kiterü  häm töbäkneñ torğızıluı mäs’äläsendäge qatğıylığın däwam itä. Törkiyä Ğazzägä bik zur külämdä gumanitar yärdäm kürsätä”, – dip äytte.

Fidan bolay dip däwam itte: “Bez sälamätlek saqlaw häm mäğarif tarmaqların reabilitaśiyäläwgä häm poliśiya köçlären äzerläwgä dä möhim öleş kertä alabız. Monnan tış, bez Xalıqara totrıqlılıq köçenä ğäskär cibärergä dä äzer. Törkiyä ğadel häm daimi tınıçlıqqa yünälgän tırışlıqlarığıznı (Trampnıñ) yaqlawnı däwam itäçäk. Mondıy tınıçlıqnıñ nigeze ike däwlätle çişeleş buluına ışanabız. Töbäktäge barlıq xalıqlar faydasına bulaçaq räweştä bu maqsatqa ireşü öçen bergä êşlik”, – dide.