Yamayka räsmiläre “Melissa” ğarasatınnan soñ torğızılu öçen berniçä qır xastaxanäse buldırırğa planlaştıruların belderde. Karib diñgeze töbägenä bärgän dawılda, kim digändä, 50 keşeneñ ülüe uylanıla häm bu sannıñ artuı mömkin.
Şimbä könenä qädär utrawda räsmi terkägän ülem oçraqları sanı 19 bulıp qala. Läkin sälämätlek saqlaw ministrı Kristofer Tufton brifingta bolay dide: "Minemçä, bu san kübräk... çönki bez älegä barıp ireşä almağan urınnar bar."
Şul uq waqıtta, Gaiti grajdannar saqlanu idaräse, ğarasat näticäsendä anda, kim digändä, 31 keşeneñ ülüen xäbär itte.
“Melissa” Yamaykada moñarçı kürelgän iñ köçle dawıl. Ul utrawğa säğatenä yaqınça 300 kilometr tizlek belän köçle cil häm yawım-töşemnär kiterde. Dawılnıñ quäte 5nçe kategoriya bularaq bäyälände.
Yamaykanıñ könbatışındağı xastaxanälär ayıruça zur zıyan kürde, şunıñ öçen räsmilär, sälämätlek saqlaw çaraların köçäytü maqsatında, berniçä qır xastaxanäse urnaştırırğa cıyına.
Berençe şundıy xastaxanä - iñ küp zıyan kürgän provinsiya başqalası Blêk Riverda qorıla. "Obyekt irtägä kitereläçäk häm şunda uq anı urnaştırıp êşkä kereşäçäkbez," dip belderde Tufton.
"Bu xastaxanä tulısınça cihazlandırılğan bulaçaq, operatsiya zalı häm başqa möhim diagnostika cihazları belän täêmin iteläçäk häm cirle törkemgä yärdäm itü öçen qayber xezmätkärlär dä bulaçaq," dip östäde ul. Räsmilär xastaxanäneñ kiläse atnada êşkä kereşäçägen kötä.
“Dönya sälämätlek saqlaw oyışması häm İspaniya, Kanada, Hindstan kebek berniçä il yärdäme belän tağın da kübräk xastaxanälär urnaştırılaçaq”, - dip belderde sälämätlek saqlaw ministrı Kristofer Tufton.
