Törkiyä mäsxät törekläreneñ Gruziyädän sörgengä cibärelüeneñ 81 yıllığın iskä ala

Törkiyä Cömhüriyäte ilbaşı Räcäp Täyyip Ärdoğan comğa könne Gruziyädän mäsxät törekläreneñ massaküläm sörgeneneñ 81 yıllığın häm sörgendä ğomeren yuğaltuçılarnı iskä aldı.

“1944 nçe yılnıñ 14 nçe noyabrendä yaqınça yöz meñ mäsxät töregeneñ tuğan cirlärennän  sörgengä cibärelü faciğaseneñ ğazabın haman da yöräklärebezdä sizäbez”, – dide Ärdoğan häm bu yullamasın Törkiyäneñ “NSosyal “ media platformasında urtaqlaştı.

Ärdoğan: “Ğomeren yuğaltqan qäwemdäşlärebezgä Allahtan yarlıqaw telim,” – dide häm sörgenneñ 81 yıllığında böten mäsxät törekläreneñ qaygısın urtaqlaştı.

Tışqı êşlär ministrlığı da yazmaça belderüendä, 1944 nçe yılnıñ 14 nçe noyabrendä, ul waqıtta Gruziya Sovetlar Berlege çikläre êçendä bulğan häm Törkiyägä kürşe Axalśixe töbägendä yaqınça 100 meñ mäsxät töregeneñ köçläp sörgengä ozatıluın iskä töşerde.

Belderüdä sörgen waqıtında meñlägän keşeneñ açlıq, salqın häm çirlär säbäple һälaq buluı belderelde.

“Sörgenneñ 81 yıllığında bu zur faciğane tirän qayğı belän iskä alabız, sörgendä ğomeren yuğaltqan qärdäşlärebezne xörmät belän iskä alabız”,- diyelde belderüdä.  

Belderüdä barlıq qıyınlıqlarga qaramastan isän qalğan mäsxät törekläreneñ üz  tellären, imanın, mädäni tradiśiyälären saqlap qalıp kiläse buınnarğa citkerä aluı assızıqlandı.

Törkiyä, şulay uq, mäsxät törekläreneñ tuğan cirlärenä kire qaytuın täêmin itäçäk prośessnıñ uñışlı tämamlanuına ömet belderde.

1944 nçe yıl sörgene

1944 nçe yılnıñ 14 nçe noyabrendä Sovet xakimiyäte Gruziyäneñ kön’yaq -könbatışındağı Axalśixedä yäşäwçelärne däwlät iminlegenä qurqınıç tudıruda ğäyepläde.

Berniçä säğat’ êçendä xatın-qızlar, balalar, olı yäş’täge keşelärne dä kertep 90 meñnän artıq keşe öylärennän mäcbüri çığarılıp yök taşu vagonnarına menderelde.

Sörgengä cibärelgän keşelär ber aydan kübräk däwam itkän  yulda Urta Aziyäneñ yıraq töbäklärenä cibärelde.

Tarixçılar fikerençä, yaqınça 17 meñ keşe açlıq, salqın häm awırular säbäple yulda һälaq buldı.