TÜRKİYE
2 min uqıu
“Oruç Räis” seysmik tikşerenü köymäse êzläw êşlärenä başlaw öçen Paqıstanğa kilep citte
Ênergetika häm tabiği çığanaqlar ministrı Alparslan Bayraqtar, Törkiyä belän Paqıstan arasında ênergetika xezmättäşlegendä yaña çorğa citelüen belderep, diñgezdä häm ciröstendä tuplam biş mäydanda êzläw êşçänlegeneñ başqarılaçağın belderde
“Oruç Räis” seysmik tikşerenü köymäse êzläw êşlärenä başlaw öçen Paqıstanğa kilep citte
"Oruç Räis" qorabı Paqıstanda neft häm tabiği gaz êzläyäçäk / AA
 

Ênergetika häm tabiği çığanaqlar ministrı Alparslan Bayraqtar “Oruç Räis” seysmik tikşerenü köymäseneñ Qaraçi portına kilep citüe belän Törkiyä häm Paqıstan arasındağı ênergetika xezmättäşlegendä yaña çornıñ başlanuın äytte.

Atnakiçen oyıştırılğan qarşı alu tantanasında çığış yasawçı Bayraqtar ike il arasında uzğan yılda İslamabadta qul quyılğan ênergetika kileşüläreneñ “Törkiyä neftläre” korporaśiyäse (TPAO) belän Paqıstannıñ OGDCL, PPL häm “Mari Energies” milli ênergetika şirkätläre arasında xezmättäşlek yulın açuın belderde.

Bayraqtar öçese diñgezdä, ikese ciröstendä buluı belän bergä biş êzläw mäydanı öçen röxsät alu êşläreneñ tämamlanuın häm cirlektä êşçänlekneñ başlatıluın iskärtep uzdı.

“Oruç Räis”neñ 19 könlek säyäxättän soñ Paqıstanğa kilep citüen belderüçe Bayraqtar qorabnıñ İndus häm Makran mäydannarınıñ ênergiyä potenśialın tikşerü belän wazıyfalandırıluın äytte.

“Oruç Räis” häm TPAO “İndus-C” cirlegendä yaqınça ike ay buyı 670 kvadrat çaqrımlıq mäydanda öç ülçämle seysmik mäğlümat cıyunı başqaraçaq.

Bayraqtar: "Bez cıyaçaq mäğlümatlär nigezendä kiläse yılda bilgelängän mäydannarda borawlaw êşçänlegen başlatunı maqsat itäbez”, - dip äytte.

Ministr Bayraqtar êzläw êşçänlegeneñ ike ilneñ üseşenä häm ênergiyä belän täêmin itügä öleş kertä alaçağın iskärtep uzdı.

Törkiyä ênergiyäne êzläw ölkäsendäge täcribäse belän urtaqlaşaçaq

Bayraqtar Törkiyäneñ neft häm tabiği gaz êzläw êşçänlegendä ildä ireşkän uñışın Paqıstanda da qabatlarğa teläwen citkerde.

Törkiyäneñ 2020nçe yılda Qara diñgezdä zur tabiği gaz rezervın tabuın xäterlätüçe Bayraqtar monıñ şul yılnı dönyada yasalğan iñ zur tabiği gaz açışı buluına basım yasadı.

Törkiyäneñ bu çığanaqlardan xäzerge waqıtta könenä yaqınça 10 million kubometr tabiği gaz citeşterüen häm monıñ yaqınça dürt million xucalıqnıñ ixtıyacın qänäğätländerüen äytte.