Soğud Ğäräbstanı räsmiläre sişämbe könne Är-Riyadta Törkiyä Cömhüriyäte İlbaşı Räcäp Tayyip Ärdoğan säfäre aldınnan Soğud Ğäräbstanı-Törkiyä investiśiyä forumınıñ açıluın belderde.
Soğud Ğäräbstanı investiśiyälär ministrı Halid Bin Abdulaziz äl-Falih forumnıñ açılış utırışında yasağan çığışında, Törkiyä İlbaşı Ärdoğannıñ Soğud Ğäräbstanına räsmi säfäreneñ "ikeyaqlı mönäsäbätlärne tağın da yuğarı urtaqlıq däräcäsenä citkerüne” maqsat itüen belderep, här ike tarafnıñ da "köçle êlemtälärdän tağın da tirän strategik mönäsäbätlärgä küçüne maqsat itüen” iskärtep uzdı.
Ministr monnan tış Forumda Soğud Ğäräbstanı belän säwdä, iqtisad häm kapital salu bağlanışların kiñäytü belän qızıqsınuçı 200dän kübräk şirkättän torğan Törkiyä biznes delegaśiyäse belän törek firmalarınıñ törle regional ofislarınıñ urın aluın äytte.
Äl Falih: “Törkiyäneñ köçle qatnaşuı ike il arasındağı strategik urtaqlıqnıñ tiränlegen çağıldıra häm iqtisadi xezmättäşlek belän şäxsi tarmaqnıñ möhim rolenä basım yasıy”, - dip belderde.
İkeyaqlı säwdä külämen 10 milliard dollarğa citkerü maqsatı
Forumda çığış yasawçı Törkiyä Säwdä ministrı Ömär Bolat Törkiyä belän Soğud Ğäräbstanı arasındağı ikeyaqlı säwdä külämeneñ qısqa waqıtta 10 milliard dollarğa citüeneñ kötelüen äytte.
Törkiyä ministrı İlbaşı Ärdoğannıñ ilgä säfäreneñ ministrlıqlar häm êş oyışmaları arasında küp sanda kileşülärgä kiteräçägen iskärtep uzdı.
Bolat bu kileşülärneñ Törkiyä-Soğud Ğäräbstanı mönäsäbätlären tağın da yuğarı däräcägä citkeräçägen häm iqtisadi bağlanışlarnı nığıtaçağına basım yasadı.
Säwdä ministrı, här ike il liderlarınıñ qısqa möddätle 10 milliard dollarlıq häm ozaq waqıtlı 30 milliard dollarlıq säwdä maqsatın bilgeläwenä iğtibarnı yünältep, 2026nçı yılnıñ 10 milliard dollarlıq maqsatqa ireşelgän yıl bulaçağına ışanuın citkerde.
Bolat qatnaşuçılarğa ike il arasındağı xäzerge säwdä külämeneñ 8,6 milliard dollardan artıp kitüen iskä töşerde.
