Awrupa Berlege Berläşkän Millätlär Oyışmasınıñ İranğa atom -töş programması säbäple yañadan kiñ qolaçlı sankśiyälär kertü qararınnan soñ oxşaş çikläwlärgä üzeneñ dä quşılaçağın belderde.

BMO ütkän atna azağında Könbatış däwlätläreneñ 2015 nçe yıl atom - töş  kileşüe qısalarında kire qaytaru mexanizmın êşlätep cibärüennän soñ bu adımnı yasadı.

27 äğ’zalı blok tarafınnan yañadan kertelgän sankśiyälär Tährannıñ atom - töş häm ballistik raketa êşçänleklärenä qağılışlı ğämällärne tıyuçı BMO çaraların üz êçenä ala.

Şulay uq bu çikläwlär İran Üzäk bankı aktivların tuñdıru kebek finans çaraların da üz êçenä alaçaq räweştä tağın da kiñräk ölkägä cäyelä.

Tähran BMO sankśiyäläreneñ yañadan ğämälgä kertelüen ğädelsez dip bäyäläde häm bu qararnı ğayepläde.

Könbatış liderları isä, çikläwlärneñ yañadan kertelüenä qaramastan, dialog kanallarınıñ açıq qaluına basım yasadı.

“Bu – diplomatiyäneñ azağı tügel”
Awrupa Berlegeneñ yuğarı däräcäle diplomatı Kaja Kallas, yäkşämbe könne yasağan belderüendä, sankśiyälärneñ yañadan kertelüeneñ diplomatiyäneñ azağı bulırğa tiyeş tügellegen äytte.

İran atom - töş qoralı êzlämäwen häm Atom - töş qoralları taratmaw kileşüen ütärgä süz bide.

Läkin Tähran London, Parij häm Berlin şähärlärendäge ilçelären kiñäşläşü öçen çaqırdı häm Könbatış däwlätläreneñ citdi näticälär belän oçraşaçağı turında kisätte.

Rusiya häm Qıtay sankśiyälärneñ yañadan kertelüen kiçekterü öçen BMO İminlek şurasında täq’dim yasadı, ämma ul uñışsız buldı.

Älege ike däwlät monıñ Yaqın Könçığışta kiyerenkelekne arttıra alaçağın da belderde.

Proyekt qararların 15 şura äğ’zasınıñ barı tik dürtese genä xupladı.