Aq Yortnıñ matbuğat süzçese Karolina Livitt, räsmi zatlar Tährannıñ niyätlären açıqlarğa ömetlängän Oman söyläşülärenä äzerlängändä, AQŞnıñ İran atom-töş programması turında diplomatiyä alıp baraçağın, ämmä söyläşülär uñışsız bulsa, İlbaşı Donald Trampnıñ başqa variantlarnı qullanu xoquqına iyä buluın äytte.

Livitt comğa könne Oman başqalası Maskatta ütkärelüe planlaştırılğan söyläşülärneñ kön tärtibe turında sorawğa: “Diplomatiyä alğa bara”, - dip cawap birde. Räsmi zatlar söyläşülärneñ, nigezdä, İran atom-töş programmasına häm başqa könüzäk mäs’älälärgä iğ’tibar itäçägen belderä.

Livitt: “İlbaşınıñ İran rejimına quyğan taläpläre açıq. Ul atom-töş köçenä iyä bulmawı mäs’äläsendä bik qatğıy häm kileşügä ireşü mömkinlegen kürergä teli”, - dide.

Aq Yort matbuğat süzçese AQŞ variantlarınıñ barı dialoğtan gına tormawı turında da iskärtte: “Bu söyläşülär barışında İran rejimına şunı xäterlätäsem kilä: İlbaşı, tarixtağı iñ quätle xärbi köçneñ baş komandirı bularaq, diplomatiyä belän berrättän başqa küp kenä variantlarğa da iyä”, - dip assızıqladı.