Germaniya politsiyäse, könçığıştaki Leypsig şähärendä küp sanda röxsätsez atu qoralları häm ber kilogramnan artıq sintetik narkotik matdä qulğa töşerelgännän soñ, ildä tıyılğan “PKK” terrorçı oyışması belän bäyläneşe buluda şöbhälänelgän ike keşene totqarladı.
“Bild” gazetı yazuınça, totqarlawlar şimbä kiçendä ütkärelgän ğadättäge yul kontrole waqıtında politsiyäneñ ber taksinı tuqtatıp, 23 yaşlek Numan K. isemle yulçını soraştıruı belän başlanğan.
Şöbhäle keşe qaçarğa mataşqan, läkin êläkterelep qulğa alınğan. Politsiyäneñ anıñ sumkasında biş danä röxsätsez 9 millimetrlı pistolet häm xärbi qoral tabuı belderelde.
Numan K. belän bergä yäşäwçe 56 yaşlek Metin B.neñ öyendä ütkärelgän tentü waqıtında isä östämä qanunsız qorallar häm ber kilogramnan artıq narkotik matdä tabilğan.
Wäqalätlelär şöbhälelärneñ 1993nçe yıldan birle Germaniyädä tıyılğan “PKK” terrorçı oyışması belän bäyläneşlären häm höcüm yasaw planı ixtimalın tikşerä.
Tikşerü qısasında, Metin B.neñ “PKK” häm oyışmanıñ Süriyädäge bülege “YPG”gä teläktäşlek kürsätüçe axırğı sotsial' çeltär yazmaları da qarala.
Germaniya iminlek wäqalätleläre ildä 15 meñnän artıq “PKK” häm “YPG” yaqlawçısınıñ aktiv buluın häm oyışmanıñ kiñ külämle propaganda êşçänlege alıp baruın belderä.
Törkiyä belän bergä Awrupa Berlege, Amerika Quşma Ştatları häm NATO da “PKK”nı 40 meñnän artıq keşeneñ ülemenä säbäpçe bulğan terrorçı oyışması dip tanıy.
Tikşerü däwam itä.
