Fälästinle aktyer häm kinorejissyer Möxämmäd Bäkri 72 yäşendä küzlären mäñgelekkä yomdı.

Anıñ tanılğan dokumental filmı “Cänin, Cänin” 2002 yılda töşerelde. Anda yaw astındağı Yordannıñ könbatış üzänlegendä urnaşqan Cänin qaçaqlar lagere añlatıla.

Xastaxanä süzçese Gal Zaid çärşämbe könne “AFP” agentlığına belderü yasap bolay dide: “Möxämmäd Bäkri bügen İzrail tönyağında urnaşqan Nahariya şähärendäge Cälilä mediśina üzägendä wafat buldı.”

Bäkrineñ ğailäse anıñ yöräk häm üpkädäge awırular arqasında yaqtı dönyadan kitüen äytte.

1953 yılda Cälilädä möselman ğailädä tuğan rejissyer fälästinle İzrail watandaşı ide.

1980nçe yıllarda töşerelgän “Diwarlar artında” isemle filmda İzrail törmäsendä utıruçı fälästinle totqınnı uynadı ul.

Aktyernıñ xalıqara danı Yordannıñ könbatış üzänlegendäge Cänin qaçaqlar lagerendä İzrail başqarğan suğış cinayätlären añlatuçı “Cänin, Cänin” filmı belän tağın da arttı.

İzrail yuğarı mäxkämäse 2022 yılda yala yağu nigeznamäse belän filmnı kürsätüne tıydı.

6 balası bulğan Bäkri İzraildäge fälästinlelärneñ wazğıyätenä iğtibarnı cälep itüçe şaqtıy dokumental film töşerde.

Ğaräp-İzrail radio stanśiyase “A-Şams” sośial mediadağı akkauntında tübändägeçä yazdı: “Teatrdağı berençe könnärennän başlap sänğat anıñ öçen küñel açu tügel, ä añlatu häm dialog çarası buldı.”