Awrupa Berlege çärşämbe könne Süriyä watandaşlarınıñ sıyınu taläplären bäyäläw öçen yañartılğan beleşmä çığardı. Ul Bäşar äl‑Äsad rejimı betkännän soň Süriyädäge üzgäreşlärne çagıldıra.

Bu üzgäreşlär sentyabr axırında qarar kötep torgan yaqınça 110 000 süriyäleneñ möräcäğätläreneñ näticälärenä täêsir itä ala.

Awrupa Berlege sıyınu agentlığı citkergänçä, Äsadnıñ säyäsi oppozitsiyäse häm xärbi xezmättän qaçuçı şäxeslärgä xäzer qurqınıç yanamıy.

Sıyınu möräcäğatläre turında qararlar il däräcäsendä qabul itelgän bulsa da, agentlıqnıñ beleşmäläre 27 Awrupa Berlege däwlätenä, şulay uq, Norvegiyä häm Şveytsariyägä mäğlümat birü öçen qullanıla.

Möräcäğatlärneñ kimüe

Agentlıq beldergänçä, Äsadnıñ tüntärelüennän soñ süriyälelärdän kilgän sıyınu taläpläre sizelerlek däräcädä kimede.

Möräcäğatlär sanı Äsadnıñ töşerelüennän alda - 2024nçe yılnıñ oktyabrendä 16 000 bulsa, 2025nçe yılnıñ sentyabrendä 3 500gä töşte.

Şulay da, berençe däräcädä qarar kötüçe oçraqlarda iñ kübe - süriyälelär.

İñ kimendä 14 Awrupa berlege däwläte xäzer süriyälelärneñ möräcäğatlären êşkärtüne tuqtattı. Alarnıñ süzlärençä, qaçaqlarnıñ şaqtıyı öylärenä qaytırga teli.

Ämma maxsus xisap kürsätkänçä, Awrupadağı süriyälelärneñ barı tik öçtän berse genä ozaq waqıtqa qaytu niyätendä häm barı tik 6% ğına monı tizdän êşlärgä uylıy. Bu iqtisadi torğızılunıñ äkren baruı häm ilneñ tulısınça imin bulmawı belän bäyle.

Süriyädä 2011nçe yılnıñ martında başlanğan watandaşlar suğışı yaqınça yarım million keşene ğomeren özde häm 23 million bulğan xalıqnıñ yartısın küçenergä mäcbür itte.

5 millionnan artıq süriyäle ilen taşlap kitte. Küpçelege kürşe däwlätlärgä, misal öçen, Törkiyägä kitte, ä qayberläre Awrupağa.

Äsadnıñ uzğan dekabrdä tüntärelüennän soñ millionnan artıq keşe Süriyägä kire qayttı häm yaqınça 2 millionı il êçendä üz regionnarına qayttı, dip xäbär birä BMO qaçaqlar yuğarı komissariatı.