AQŞ İlbaşı Donald Tramp häm AQŞ Kongressı äğzası İlhan Omar arasında kiyerenke bäxäs kilep çıqtı. Tramp Demokrat deputatlarnı möhacirlek säyäsäte mäs'äläsendä tänqıytläde häm çik iminlegen yaqlamawda gäyepläde.

Tramp sişämbe könne Kongressnıñ urtaq utırışında yasağan "Däwlätneñ xäle" çığışı waqıtında deputatlarnı, üzeneñ idaräse öçen "töp prinsip" dip atağan fikerne yaqlasalar, ayağürä basarğa çağırdı.

AQŞ İlbaşı: "Däwlätneñ xäle” çığışınıñ iñ yaxşı yaqlarınıñ berse – amerikalılarğa üz wäkilläreneñ çınlıqta närsägä ışanganın açıq kürergä mömkinlek birüe. Şunıñ öçen bu kiç härber deputatnı, idarämä quşılıp, töp prinsipnı yañadan raslarğa çağıram. Bu süzlär belän kileşäsez ikän, ayağürä torığız häm yaqlawığıznı kürsätegez. Amerika xökümäteneñ berençe burıçı – qanunsız möhacirlärne tügel, Amerika watandaşların saqlawdır," – dide.

Demokrat deputatlar urınnarında utıruın däwam itkäç, Tramp mönbärdän qatğıy cawap birde.

Tramp: "Ayaqqa basmağanığız öçen üzegezdän oyalırğa tiyeşsez, xurlıq," – dide.

Donald Trump Kongressnı "sıyınu şähäre" dip atalğan säyäsätlärne tuqtatırğa häm awır cinayätlärdä gäyeplängän qanunsız möhacirlärneñ deportatsiyäsenä kirtä bulğan däwlät xezmätkärlärenä cäza birergä çağırdı.

Tramp söylägän waqıtta Minnesotadan Demokrat deputat Omarnıñ qıçqıruı işetelde.

Omar: "Sez amerikalılarnı üteräsez!" – dip qıçqırdı häm östäde: "Sez amerikalılarnı üterdegez! Oyalırğa tiyeşsez!"