BMO Ğomum särqatibe Antonio Guterreş Gvineyä-Bisawda ğaskärneñ bu atnada, xakimiyätne bärep töşerep, Könbatış Afrika ileneñ Däwlät başlığın wazıyfasınnan aluı belän bäyle bularaq “bik nıq borçıluın”, süzçeseneñ atnakiçen yasağan belderüendä konstituśion tärtipneñ “xäzer ük häm şartsız” bularaq qaytarıluın taläp itüen belderde.

Süzçe Stefan Dyujarrik yasağan belderüendä 23nçe noyabrdäge ğomum saylawda tınıç räweştä tawış birgän xalıq ixtıyarın sanğa suqmawnıñ demokratik nigezlärne qabul itelmäslek bozu oçrağı buluına basım yasadı.

Gvineyä-Bisaw armiyası Umaro Sissoco Embalonı wazıyfasınnan aldı häm ilneñ ciröste, diñgez häm hawa çiklären yaptı. Ğaskär xakimiyätneñ ilne “totrıqsızlaştıruğa” yünälgän säyäsätne alıp baruı arqasında tüntäreleş yasawın belderde.

Üzlären “Milli qurqınıçsızlıqnıñ häm däwlät tärtibeneñ yañadan urnaştırıluı öçen yuğarı xärbi komandalığı itep tanıtuçı ber törkem ofiśerlar däwlät televideniyäsennän tapşırılğan belderüdä “däwlätneñ böten wäqälätlären üz östenä aluların” iğlan itte.

Armiya böten media êşçänlegen tuñdırdı, däwam itüçe saylaw barışın tuqtattı, böten çiklärne yaptı häm cirle waqıt belän säğät kiçke 9da (21:00 GMT) başlanğan tuğız säğätlek komendant säğäten kertte.

Tüntäreleş bulğan waqıtta atna axırında ütkärelgän saylaw näticäläre kötelgän çaqta bäysez namzät Fernando Dias belän wazıyfadağı İlbaşı Embalonıñ törkeme düşämbe könne ciñülären iğlan itkän ide.

Annan soñ ğaskär ber generalnı ilneñ yaña liderı itep bilgeläde.

Gvineyä belän Senegal arasında urnaşqan Gvineyä-Bisaw 1974nçe yılda Portugaliyädän bäysezlegen alğannan birle dürt tüntäreleş häm küp sanda tüntäreleş omtılışın kürde, ilneñ saylaw näticäläre bik yış bäxäslärgä säbäp bula.