NASA şartlaw näticäsendä köçle tawış dulqını barlıqqa kilüen häm yaqınça 300 tonna trotilğa tiñ ênergiyä bülenep çığuın belderde.

NASA yañalıqlar mödire urınbasarı Djennifer Doren “AFP” agentlığına ut şarınıñ cirle waqıt belän köndezge 2:06 säğattä (Törkiyä waqıtı belän kiçke 9:06 säğattä) Massaçusetsnıñ tön’yaq-könçığışı häm N’yu-Gämpşirnıñ könyaq-könçığışı östendä tarqaluın äytte.

Doren bolay dide: "Bu ut şarı xäzerge waqıtta aktiv bulğan bernindi meteor yañğırı belän dä bäyle tügel. Ul tulısınça tabiğıy obyekt, ğaläm çüp-çar yaki iyarçenneñ atmosferağa kerüe turında süz dä yuq. Tarqalu waqıtında çığarılğan ênergiyä yaqınça 300 tonna trotilğa tiñ dip isäplänä, bu köçle şartlaw tawışları kiterep çığarğan."

Doren asteroid atmosferağa kergändä sägatenä 120 000 kilometrdan (sägatenä 75 000 mil’) artıp tizlek belän xäräkät itüen häm şartlawnıñ yaqınça 64 kilometr (40 mil’) biyeklektä buluın bilgeläp ütte.

Kinät bulğan köçle tawışlar arqasında keşelär panikağa birelä, ä sotsial’ çeltär qullanuçıları şartlawnıñ yortlarnı selketerlek köçle buluın xäbär itä.

Bu xäl Çiläbe waqıyğasın iskä töşerä

Bu waqıyğa 2013 yılda Rusiyäneñ Çiläbe şähäre östendä şartlağan meteoritnı iskä töşerä.

NASA mäğlümatları buynça, ul waqıtta yort zurlığındağı asteroid cir östennän 22 kilometr (14 mil’) biyeklektä tarqalğan häm yaqınça 440 000 tonna trotilğa tiñ zur külämdä ênergiyä çığarğan.

Rusiyädäge bu şartlaw 518 kvadrat kilometr mäydandağı täräzälärne watqan häm 1600dän artıq keşe, kübesençä watıq pıyalalardan, imgängän.