Filippinneñ könyağında atna başında bulğan köçle cirteträwdä häläq buluçılarnıñ sanı 61gä citkän bulsa, êzläw qotqaru törkemnäre Mindanaonıñ iñ küp zıyan kürgän töbäklärendäge êşçänlegen däwam itä.
Filippin grajdan saqlanu ofisı şimbä könne yasağan belderüendä zilzilädän täêsirlängän töbäklärdä yaña mäyetlärneñ tabıluınnan soñ ülüçelär sanınıñ artuın iğlan itte.
“GMA News” televideniyäse 33 keşedän äle dä xäbär alınmawın, 1 meñ 221 keşeneñ isä yaralanuın citkerde.
Räsmilär ğadättän tış xällär törkemnäreneñ cir şuışuı häm cimerelgän qorılmalarnıñ astında qalğan keşelärne qotqarırğa häm häläq buluçılarnın mäyetlärenä ireşergä tırışuın, êzläw-qotqaru häm êvakuaśiyä êşläreneñ däwam itüen belderde.
Afät köräş operaśiyäläre küzätü häm mäğlümat üzäge zilzilädän Mindanao töbägendä 553 meñ 68 keşeneñ zıyan kürüen belderde.
“Philippine Daily Inquirer” gazetı citkergänçä, yaqınça 9 meñ 393 keşe êvakuaśiyä üzäklärendä qalğan bulsa, 54 meñ 274 keşe dä räsmi êvakuaśiyä üzäklärennän tış tuğannarı häm iptäşläreneñ yanında waqıtlıça sıyınu mömkinlegen tapqan.
Zur külämle zıyan
Berençe zıyan bäyäläwlärenä kürä, 8 meñ 865 yort tulısınça cimerelgän, 36 meñ 691 yort isä öleşçä zarar kürgän.
İyärçen cirteträwläre (afterşoklar), zıyan kürgän binalar tudırğan qurqınıç häm zarar kürgän yullar qotqaru êşlären totqarlap, yärdäm törkemnäreneñ qayber töbäklärgä barıp citüen qıyınlaştırdı.
Atna başında Mindanao kiñlegendä barlıqqa kilgän 7,8 zurlığındağı cirteträw kiñ panika tudırdı, yortlarğa, mäktäplärgä, xastaxanälärgä häm cämäğät asqormasına zur zıyan kiterde.
İñ küp zıyan kürgän töbäklär arasında General Santos şähäre belän Sarangani vilayäteneñ qayber öleşläre bar. Räsmilär yärdäm häm yañadan tözekländerü êşçänlegen tizlätü maqsatınnan çığıp bu töbäklärdä ğadättän tış xäl iğlan itte.
