Rusiyä belän Ukraina Pasxa uñayınnan 32 säğatkä utnı tuqtattı
Ukraina ilbaşı Volodimir Zelenskiy utnı tuqtatu üz köçenä kerergä berniçä säğat qala belderü yasadı häm Kiyevneñ älege inisiativağa quşılaçağın häm “şul uq räweşle” cawap biräçägen äytte.
Rusiyä saqlanu ministrlığı Ukraina belän ike arada 32 säğatlek utnı tuqtatunıñ şimbä könne säğat 16.00da üz köçenä kerüen belderde.
Rusiyä İlbaşı Vladimir Putin, Pasxa uñayınnan Ukraina belän ike arada utnı tuqtatuın iğlan itep, monıñ 11 apreldän 12 aprel' axırına qadär ğamäldä bulaçağın citkerde. Ul Ukrainanıñ bernindi provokatsiyä yasamasqa tiyeşlege, yasağan oçraqta Mäskäwneñ cawap biräçäge turında kisätte.
Utnı tuqtatu şimbä könne üz köçenä kergängä qadär berniçä säğat qala, Ukraina İlbaşı Volodimir Zelenskiy Kiyevneñ älege inisiativağa quşılaçağın häm “şul uq räweşle” xäräkät itäçägen äytte.
Zelenskiy “Telegram” aşa yasagan belderüendä: “Ukraina tınıçlıq rejimına buysınaçaq häm tulısınça berdäy xäräkät itäçäk. Rusiyädän hawada, qorı cirdä häm diñgezdä höcüm bulmawı – bezneñ dä cawap birmiyäçägebezne añlata”, - dide.
Zelenskiy Ukraina armiyäseneñ frontta bulırğa mömkin barlıq waqıyğalarğa äzer buluın belderde.
“Ukraina Rusiyägä berniçä tapqır törle utnı tuqtatu formatların täqdim itte häm bez Pasxanıñ tınıçlıq häm iminlek waqıtı bulırğa tiyeşlegenä ışanabız. Pasxa öçen täêmin iteläçäk utnı tuqtatu tınıçlıq yulında çın alğarışnıñ başlanğıçı da bula ala - bezneñ yaq monıñ belän bäyle üz täqdime kertte”, - dide ul.
Zelenskiy utnı tuqtatu waqıtında Ukraina xärbiläreneñ totışın ilneñ xärbi citäkçelege belän dä qarawın äytte.
“Ğamällärebezneñ üzara bäyle bulaçağı häm utnı tuqtatunı Pasxa bäyrämennän soñ da ozaytu mömkinlege turındağı mäğlümat Rusiyä yağına citkerelde”, - dide ul.