AQŞ ilbaşı Donald Tramp Rusiyägä kübräk sankśiya kertergä äzer buluın läkin Awrupanıñ Vaşington citäkçelege belän parallel räweştä êş başqaruı zarurlığın äytte.
Tramp yäkşämbe könne Nyu-Djersidan Aq Yortqa qaytqan waqıtta jurnalistlarğa belderü yasap bolay dide: “Awrupa Rusiyädän neft satıp ala. Monı telämim, sankśiyaläre citärle däräcädä qırıs tügel. Çikläw kertergä äzer min läkin alarnıñ sankśiyaläre minekelär kebek qırıs bulırğa tiyeş.”
AQŞ liderı bu yullamanı şimbä könne Amerikanıñ sośial media platforması “Truth Social”da NATO illärenä häm bar dönyağa yazğan xatında citkerde.
“Barlıq NATO illäre ber ük närsäne qabul itep başlatqaç häm barlıq NATO illäre Rusiyädän neft alunı tuqtatqaç älege ilgä zur sankśiyalär kertergä äzer min,” – dide ul.
AQŞ liderı qayber illärneñ Rusiyädän neft alırğa däwam itüen şaqqattıruçı dip atadı.
Tramp monnan alda Ukraina suğışın tuqtatuda alğarış täêmin itelmägän oçraqta Rusiyä neften aluçı illärgä ikençel sankśiyalär kertü belän yanağan ide.
AQŞ Hindstannıñ Rusiyädän neft importlawın nigeznamä kürsätep, älege il tovarlarına 25% östämä tamğaxanä salımın kertte.
G7 illäre häm Awrupa Berlege Rusiyä nefte bäyäsen çikläde. Moña cawap itep Rusiyä Qıtay häm Hindstan kebek illärgä neft satunı arttırdı.
27 äğzalek Awrupa berlege Rusiyädän neft häm gaz importın 2028 yılnıñ 1 ğıynwarına qadär tulısınça tuqtatırğa süz birde.
Köräş däwam itä
Şul arada Ukraina ilbaşı Volodimir Zelenskiy Ukraina köçläreneñ tönyaqtağı Sumı töbägeneñ çik buyı rayonnarında alğa baruın äytte. Bu töbäktä Rusiyä berlekläre aylar buyı tayanu noqtasın buldırırğa tırıştı.
Zelenskiy tönlä yazdırğan video yazmada yuğarı däräcäle citäkçelärdän berseneñ Doneśk häm Xarkov töbäklärendäge meñ çaqrımlıq front liniyase buyınça Rusiyä köçläreneñ yuğaltular kiçerüen äytüen citkerde.
“Sumı ölkäseneñ çik buyı töbäklärendä yaxşı näticälär bar. Berleklärebez Ukrainanıñ däwlät çigenä taba bara,” – dide Zelenskiy.
