İran häm Rusiyä İrannıñ könyağındağı Hürmüzgan vilayätendä öçençe buın qamilläşterelgän dürt atom-töş ênergiyäse blogın tözü turında 25 milliard dollar bäyäsendä başqarma kileşüenä qul quydı. Bu turıda comğa könne İrannıñ “IRNA” xäbär agentlığı belderde.

Qul quyu tantanası Mäskäwdä uzğan Bötendönya atom atnalığı çaraları qısalarında oyıştırılğan “Atom Expo 2025” kürgäzmäsendä İran pavilionında uzdı.

Kileşügä kürä, yaña atom-töş ênergiyä bloglarınıñ härberseneñ küäte 1,255 megawatt bulaçaq, ä barlığı quät 5,020 megawattqa citäçäk. Bu proyekt İrannıñ könçığışındağı Kouhestak şähäre yanında 500 gektar cir mäydanında tormışqa aşırılaçaq.

Bu adım bu atnada Mäskäwdä İran İlbaşı urınbasrı Möxämmäd İslami häm “Rosatom” general direktorı Aleksey Lixaçev arasında atom ölkäsendä xezmättäşlekne kiñäytü turında imzalanğan kileşü memorandumınnan soñ yasaldı.

Möhim qızıqsınu

Räsmi zatlar bu kileşüneñ ike ilneñ "atom energiyäsen tınıç maqsatlarda qullanu ölkäsendä urtaq xezmättäşlekne üsterügä birelgän tuğrılıqnı" çağıldıruın äytte.

Bötendönya atom atnalığı çaraları Rusiyäneñ atom industriyäsenä 80 yıl tulu uñayınnan bıyıl atom ölkäsendä iñ zur xalıqara cıyın, dip bäyälänä. Kürgäzmädä İran, Rusiyä, Qıtay, Belarus, Qazaqstan, Üzbäkstan häm berniçä xalıqara oyışmanıñ pavilionnarı atom energiyäsen tınıç maqsatlarda qullanu ölkäsendäge uñışların täqdim itä.

İrannıñ Mäskäwdäge maxsus pavilionı pänceşämbe könne Möxämmäd İslami qatnaşında açıldı häm küp sanda qızıqsınuçılarnı cälep itte.

Şul uq könne Bötendönya atom cıyını Rusiyä İlbaşı Vladimir Putin, Möxämmäd İslami häm 100dän artıq il häm xalıqara oyışma wäkilläre qatnaşında uzdı.