Rusiyä - Ukraina arasında äsirlär belän almaşu bulğan häm ike yaqtan da 185 ğaskäri illärenä qaytarılğan.

Rusiyä saqlanu ministrlığınıñ comğa könge açıqlawında, Berläşkän Ğaräp Ämirlekläreneñ älege äsirlär belän almaşuda aradaşçı buluı belderelde.

Şulay uq Rusiyä ğaskäriläreneñ xäzerge waqıtta Belarustä buluı häm Rusiyäneñ Keşe xoquqların yaqlaw komissarı Yana Lantratovanıñ alar yanında buluı äytelde.

Ministrlık açıqlawında bolay diyelde: "Azat itelgän xärbilär xäzerge waqıtta Belarustä; biredä psixologik häm mediśina yärdäme kürälär. Annarı däwalaw häm reabilitaśiya öçen Rusiyägä cibäreläçäklär."

Qayber yuğarı däräcäle Ukraina räsmi zatları, äsirlär belän almaşu öçen äzerleklärneñ soñğı atnalarda başlanuın belderde.

Bu almaşu, Ukraina däwlät başlığı Volodimir Zelenskiynıñ dürt yıllıq bäreleşne beterü öçen Rusiyädäge wazifadaşı Vladimir Putinnı küzgä-küz küreşüne qabul itärgä çaqıruınnan ber könnän soñ tormışqa aşqan.

Rusiyä saqlanu ministrlığı tübändäge belderüne yasadı: "5 iyündä Kiyev rejimı kontrolendäge cirlärdän 185 Rusiyä ğaskäriye qaytarıldı. Monıñ öçen 185 Ukraina äsire tapşırıldı."

Zelenskiy irekkä cibärelgän qayber Ukraina ğaskäriläreneñ 2022 yıldan birle Rusiyädä totıluın äytep, sośial' mediada bolay dip yazdı: "Keşelärebezneñ kire qaytuı Ukraina öçen berençe östenlek. Här kön Ukrainalı ir-at häm xatın-qızlarnı äsirlektän qotqaru öçen tırışabız."

Ukraina räsmi zatları Ukraina bayraqlarına sarılğan, çäçläre qırılğan xärbilärneñ ber-bersen qoçaqlağan fotoräsemnäre belän urtaqlaştı.