Törkiyä ilbaşı Räcäp Täyyip Ärdoğan Amerika Quşma Ştatları belän İran arasındağı kiyerenkelekne kimetügä yünältelgän diplomatik tırışlıqlarnıñ däwam itüen, prośessnıñ canlı häm diplomatiya öçen açıq buluın belderde.

Soğud Ğaräbstanı häm Mısır säfärlärennän soñ pänceşämbe könne Törkiyägä qaytışlıy jurnalistlarğa belderü yasağan Ärdoğan:
“Bez Amerika belän İran arasındağı kiyerenkelekne töbäkne yaña bäreleşkä, xaosqa tartmıyça xäl itü öçen qulıbızdan kilgänneñ barısın da êşlibez”, — dip äytte.

İlbaşı Törkiyäneñ bu yünäleştäge tırışlıqlarına işaräläp, AQŞ ilbaşı Donal’d Tramp belän söyläşülär ütkärüen, ikençe könne isä İran ilbaşı Mäsud Päzäşkiyan belän dä êlemtägä kerüen citkerde.

Şulay uq ul İstanbulda Törkiyä tışqı êşlär ministrı Xakan Fidan häm İran tışqı êşlär ministrı Abbas Arakçi qatnaşında öç yaqlı oçraşu ütkärüen dä äytte.

“Bez İranğa qarata xärbi qatışuğa qarşı buluıbıznı açıqtan-açıq belderdek häm monı barlıq xezmättäşlärebezgä citkerdek” digän Ärdoğan, älegä yaqlarnıñ diplomatiyägä urın açarga teläwlären kürüen häm monıñ uñay waqıyğa buluın äytte.

“Problemalarnı çişü yulı bäreleşlär tügel, ä kileşü nigeze häm söyläşülär”, - dide ul.

Ärdoğan, tübän däräcädäge söyläşülärdä alğa kiteş bulğannan  soñ, liderlar däräcäsendä dä söyläşülär alıp baru faydalı bulır dip uylawın äytte.

Xärbi kiyerenkelek bu qädär köçäygän waqıtta söyläşülär östälen buldırunıñ zur ähämiyätkä iyä buluın citkerde.  

 Töbäk dinamikasına qağılışlı sorawğa cawap birgän Ärdoğan, Soğud Ğaräbstanın da kertep, Farsı qultığı illäreneñ  yaña suğış telämäwen häm diplomatiyägä tağın da kübräk östenlek birülären äytte.  

“Härkem belä: töbägebäzdä tulısınça urnaştırılaçaq tınıçlıq, iminlek häm totrıqlılıq bezneñ barıbızğa da fayda kiteräçäk”, — dide ilbaşı.  

Bu mäs’älägä fäqat’ xärbi küzlektän genä qarawnıñ töbäkne fäläkätkä alıp baraçağın äytkän Ärdoğan:
“Töbägebez qan, küz yäşe, suğışlardan  tuydı. Xäzer bez tınıçlıq häm iminlek turında söyläşergä, xezmättäşlekne arttırırğa telibez”, — dide.

Ärdoğan bu belderülärne İran belän AQŞ comğa könne Omanda söyläşülärgä äzerlängändä yasadı.