AQŞ Üzäk komandirlığı (CENTCOM) İrannıñ Ormuz  buğazı yanında ber säwdä köymäsenä oyıştırğan soñğı höcümennän soñ Amerika köçläreneñ İrandağı küp sanda ob’yektlarğa höcüm itüen rasladı.

CENTCOM tarafınnan şimbä könne yasalğan belderüdä höcümnärneñ AQŞ ilbaşı kürsätmäse nigezendä 27 iyün könne başqarıluı äytelde.

Belderügä qarağanda, İran köçläre Panama bayrağı astında yözgän Kiku  tankerına beryaqlı pilotsız oçu apparatı belän höcüm itkän.

İke million miçkädän artıq êşkärtelmägän neft' taşığan tanker comğa könne Ormuz buğazı yanınnan ütkändä höcümgä duçar bulğan.

CENTCOM:”Amerika köçläre İrannıñ säwdä köymälärenä qarşı däwam itkän höcümnärenä turıdan-turı cawap bularaq bügen operaśiyälär ütkärde”,-dip belderde.

AQŞnıñ xärbi oçqıçları İrannıñ xärbi küzätü infrastrukturasına, êlemtä sistemalarına, hawa saqlanu noqtalarına, pilotsız oçu apparatların saqlaw obyektlarına häm diñgez minaları urnaştıru mömkinleklärenä höcüm itkän.

Komandirlıq säwdä köymäläreneñ Ormuz buğazı aşa ütüen däwam itüen belderde, Amerika köçläreneñ  äzer xäldä buluın iskärtte.

İran däwlät televideniyese yäkşämbe irtäsendä ilneñ könyağındağı Sirik şähärendä küp sanda şartlaw tawışları işetelüen xäbär itte.

Xärbi çığanaqqa nigezlängän xäbärdä snaryadlar Tahruyi awılındağı telekommunikaśiya manarasına kilep tigän.

İrannıñ Fars xäbär agentlığı da ilneñ könyağındağı Keşm utrawında urnaşqan Misin awılında şartlaw tawışı işetelüen citkerde.

Ülem oçraqları yäki yaralanular turında älegä bernindi mäğlümat urtaqlaşılmadı.