A“New York Times” gazetı oçraşu belän tanış bulğan anonim çıganaqlarğa sıltama belän xäbär itkänçä, AQŞ ilbaşı Donald Tramp İrannıñ Ormuz buğazın açu häm suğışnı tuqtatu täqdimennän qanäğat tügel.

Düşämbe könne Aq Yortta Trampqa Tährannıñ planı turında mäğlümat birelde. Aña AQŞnıñ möhim su yolın blokadalawnı tuqtatuı da kerä.

“Times” gazetına söylägän berniçä AQŞ häm İran räsmiye täqdımdä İrannıñ atom-töş programmasındağı kiläçäk adımnar turında süz barmawın äytte.

İran êlegräk AQŞnıñ barlıq uran bayıtu êşçänlegen tuqtatu häm inde moña qadär bayıtılğan urannı tapşıru taläplären kire qaqtı, xalıqara xoquq nigezendä monı êşlärgä xoquqlı dip belderde.

Trampnıñ qaysı yaqtan qanäğat tügellege tögäl açıqlanmadı, şulay da, ul atom-töş programması belän bäyle ike taläbendä nıq tora.

Aq Yort wäkile Oliviya Uêls “The Times” gazetına bolay dide: "AQŞ matbuğat aşa söyläşülär alıp barmayaçaq, bez qızıl sızıqlarıbıznı açıq kürsättek, häm ilbaşı Amerika xalqı häm dönya öçen faydalı kileşü genä töziyäçäk".