AQŞ ilbaşı Donald Tramp Aq Yort yanında Äfğanstan watandaşınıñ oyıştırğan qorallı höcümnän soñ üz xökümäteneñ sıyınu birüne "ozaq waqıtqa" tuqtatırğa niyätläwen äytte.
Ul yäkşämbe könne Floridadağı Mar-a-Lago utarında Räxmät köne yalın uzdırıp Vaşingtonğa kire qaytışlıy oçqıçında jurnalistlarğa: "Minemçä, ozaq waqıtqa tuqtatılaçaq. Bolay da problemalarıbız citärlek. Bu keşelärneñ kiräge yuq," dip äytte.
Sıyınu möräcäğatlären qarawnıñ qayçanğa qadär tuqtatılaçağı turındağı sorawğa Tramp: “Waqıt çikläwe yuq, bik ozaqqa bulırğa mömkin”,-dip cawap birde.
Tramp bu säyäsätneñ anıñ "küp cınayät başqarğan" häm "bezgä dus bulmağan" dip bäyäläwçe illärdän kilüçelärgä yünältelüen äytte, ä qayber illärneñ "üz êçlärendä kontrol'dän çığuın" söyläde. Ul Somalinı ayırıp atadı häm: "alarnıñ keşeläre bezneñ ilgä kilep, bezgä niçek idarä itärgä ikänen öyrätmäkçe bulalar” dide.
Belgeçlär Trampnıñ älege süzläre belän Somalida tuğan Demokratik partiyädän AQŞ kongressı wäkile Ilhan Omarğa törtterüen belderde.
Vaşingtonta atış
26 noyabrdä Vaşingtonta bulğan höcümdä 20 yäşlek saqçı Sara Bekstromnıñ ğomere özelde, tağın ber saqçı 24 yäşlek Êndryu Wolf awır yaralandı.
Amerika matbuğatındağı xäbärlärgä qarağanda, höcümne başqarğan Raxmanullax Lakanwal, 2021nçe yılda AQŞ Äfğanstannan çıqqannan soñ, ilgä kilä häm monnan alda CİA häm başqa xökümät oyışmalarında êşli.
Lakanwalğa 2025nçe yılnıñ aprelendä Tramp xökümäte waqıtında sıyınu birelgän.
Läkin räsmi zatlar anıñ AQŞka Bayden çorında kergän buluın häm ul waqıtta tikşerü çaralarınıñ citenkerämäwen assızıqlıy.
